હેલ્થ / ભીંડાનું શાક સાંભળીને મોઢુ ચડાવતા લોકો ખાસ વાંચે, આ છે ફાયદા

•  ભીંડાના છે આ ફાયદા 
• ભીંડા ખાવાથી આંખોનુ તેજ વધે
• ચામડીમાં નિખાર લાવે છે ભીંડા

ઉનાળામાં ભીંડાનું ઉત્પાદન પણ મોટા પ્રમાણમાં થાય છે. બજારમાં પણ સરળતાથી ભીંડા મળી રહે છે. મોટા ભાગના લોકોને ભીંડાનું કોરું અથવા તો ભરેલા ભીંડાનું શાક ભાવે છે.

ભીંડામાં પોષક તત્ત્વો ભરપૂર પ્રમાણમાં હોય છે. પરિણામે ભીંડા સ્વાસ્થ્ય માટે ખૂબ ફાયદાકારક છે. ભીંડામાં ફાઇબરનું પ્રમાણ ખૂબ ઊંચું હોય છે, જેના કારણે પેટની બીમારીઓ દૂર રહે છે. ભીંડા રોગપ્રતિકારક શક્તિ વધારવામાં પણ ખૂબ મહત્ત્વનો ફાળો આપે છે. ભીંડા ખાવાથી ઇન્ફેક્શન લાગવાનું જોખમ ઘટે છે. ઉનાળામાં ભીંડા ખાવાથી થતા ફાયદા જાણો અને તેનું સેવન કરો.

વજન ઘટાડે છે
ભીંડામાં વજન ઘટાડવા માટે મદદરૂપ એવા કાર્બ્સ હોય છે. આ ઉપરાંત ભીંડામાં એ‌િન્ટ ઓબેસિટી ગુણ છે, જે વજન ઘટાડવામાં મદદ કરે છે. માટે જે લોકો વજન ઘટાડવાનો પ્રયાસ કરે છે, તેમણે પોતાના ખોરાકમાં ભીંડાને સામેલ કરવા જ જોઈએ.

ચામડીમાં નિખાર લાવે
ભીંડા ખાવાથી ત્વચા પર નિખાર આવે છે. જો ઉનાળા દરમિયાન તમારી ત્વચા યુવાન દેખાય તેવું ઈચ્છતાં હો તો ભીંડાનું સેવન કરવું જ જોઈએ. ભીંડામાં વિટામિન-સીનું પ્રમાણ વધુ હોય છે. આ ઉપરાંત બીટા કેરો‌ટીનના રૂપમાં વિટામિન-એ પણ મળે છે, જેનાથી ત્વચા નિખરે છે.

રોગપ્રતિકારક શક્તિ વધે છે
ઉનાળા દરમિયાન ભીંડાનું સેવન કરવાથી રોગપ્રતિકારક શક્તિ વધે છે. પરિણામે અનેક પ્રકારના વાઇરલ ઇન્ફેક્શનથી રક્ષણ મળે છે. રોગપ્રતિકારક શક્તિ વધે એટલે બીમારીનું જોખમ ઘટી જાય છે.

પેટની તકલીફો રાખે દૂર
ઉનાળામાં અનેક લોકોના પેટમાં ગરબડ થાય છે. આવી સ્થિતિમાં ભીંડાનું સેવન કરવાથી પેટની સમસ્યાઓ દૂર રહે છે. ભીંડામાં મોટા પ્રમાણમાં રહેલું ફાઇબર પાચનશક્તિમાં મદદરૂપ બને છે.

આંખોનું તેજ વધે છે
ભીંડા આંખોનું તેજ વધારે છે. જે લોકો આખો દિવસ કમ્પ્યૂટર સામે બેસી રહે છે તેમના માટે ભીંડાનું સેવન ખૂબ ઉત્તમ છે. ભીંડામાં બીટા કેરોટીન મળી આવે છે, જે આંખોની રોશની વધારવા માટે મદદ કરે છે.