નવો વાયરસ / બેલ્ઝિયમમાં મંકીપોક્સ સંક્રમિત લોકો ક્વારન્ટીન થશે, આ નિયમ લાગૂ કરનારો વિશ્વમાં બન્યો પ્રથમ દેશ

• કોરોના બાદ વિશ્વમાં નવા વાયરસની એન્ટ્રી
• વાંદરામાંથી ફેલાયેલો આ રોગ માણસોમાં આવ્યો
• વિશ્વભરમાં 80 જેટલા કેસો નોંધાયા

મંકીપોક્સથી સંક્રમિત લોકો માટે ક્વોરેન્ટાઇન ફરજિયાત બનાવનાર બેલ્જિયમ વિશ્વનો પ્રથમ દેશ બન્યો છે. છેલ્લા કેટલાક દિવસોમાં આ વાયરસ સમગ્ર યુરોપમાં ફેલાયો છે. એકલા યુકેમાં મંકીપોક્સના 20 કેસ નોંધાયા છે. અત્યાર સુધીમાં લગભગ 12 દેશોમાં મંકીપોક્સના કેસ નોંધાયા છે. બેલ્જિયમ મંકીપોક્સને લઈને અધિકારીઓએ જાહેરાત કરી હતી કે, જે લોકો વાયરસથી સંક્રમિત જણાયા છે અને લક્ષણો દેખાય છે, તેઓને 21 દિવસ માટે ક્વારન્ટીન રાખવામાં આવશે. દેશના રિસ્ક એસેસમેન્ટ ગ્રુપ અને સ્વાસ્થ્ય અધિકારીઓ વચ્ચેની બેઠક બાદ આ નિર્ણય લેવામાં આવ્યો છે.

બ્રિટેનમાં 20 નવા કેસની પુષ્ટિ થઈ

બેલ્જિયમમાં અત્યાર સુધીમાં મંકીપોક્સના ચાર કેસ નોંધાયા છે. આમાંથી ત્રણ કેસ એન્ટવર્પમાં ગે ફેસ્ટિવલ સાથે સંબંધિત હોવાનું જાણવા મળ્યું છે. ફેસ્ટિવલના આયોજકોએ એક નિવેદનમાં જણાવ્યું હતું કે, 'અન્ય દેશોમાં નોંધાયેલા તાજેતરના કેસોને પગલે, એવું માનવા માટેનું કારણ છે કે આ ફેસ્ટિવલમાં વિદેશથી આવેલા પ્રવાસીઓ દ્વારા વાયરસ લાવવામાં આવ્યો છે.' UKમાં મંકીપોક્સ કેસ સમુદાય ટ્રાન્સમિશન દ્વારા ફેલાય છે. એક વરિષ્ઠ ડૉક્ટરે આ અંગે ચેતવણી આપી છે અને કહ્યું છે કે, બ્રિટનમાં દરરોજ કેસ આવી રહ્યા છે. યુકે હેલ્થ સિક્યુરિટી એજન્સી (UKHSA) એ 20 નવા કેસની પુષ્ટિ કરી છે. અન્ય દેશોમાં પણ નવા કેસ નોંધાયા છે.

આ લોકોમાં સૌથી વધુ કેસ બહાર આવી રહ્યા છે

આ રોગ સૌપ્રથમ વાંદરાઓમાં જોવા મળ્યો હતો. મંકીપોક્સ વિશે સૌથી ચિંતાજનક બાબત એ છે કે વાયરસ જાતીય સંભોગ સહિત શારીરિક સંપર્ક દ્વારા માણસથી માણસમાં ફેલાય છે. યુકેએચએસએના મુખ્ય તબીબી સલાહકાર ડૉ. સુઝાન હોપકિન્સે જણાવ્યું હતું કે, યુકેમાં નોંધાયેલા મંકીપોક્સ કેસોની અપડેટ સંખ્યા સોમવારે જાહેર કરવામાં આવશે. તેમણે ચેતવણી આપી હતી કે, મોટાભાગના મામલા એવા લોકોના સામે આવ્યા છે જેઓ પોતાને ગે અથવા બાયસેક્સ્યુઅલ ગણાવે છે. આવા લોકોમાં જ કોમ્યુનિટી ટ્રાન્સમિશન જોવા મળ્યું છે. ડૉ. હોપકિન્સે કહ્યું કે અમે એવા લોકોનો આભાર માનવા માંગીએ છીએ, જેઓ આગળ આવીને ટેસ્ટ કરાવી રહ્યા છે.

વિશ્વભરમાં 80 કેસોની પુ્ષિટ થયાનો કર્યો દાવો

વર્લ્ડ હેલ્થ ઓર્ગેનાઈઝેશન (WHO) એ વિશ્વભરમાં મંકીપોક્સના લગભગ 80 પુષ્ટિ થયેલા કેસો અને લગભગ 50 શંકાસ્પદ દર્દીઓની ઓળખ કરી છે. મંકીપોક્સના ચેપના કેસો અગાઉ ફક્ત મધ્ય અને પશ્ચિમ આફ્રિકાના લોકોમાં જોવા મળતા હતા, પરંતુ હવે તેના દર્દીઓ બ્રિટન, સ્પેન, પોર્ટુગલ, ઇટાલી, યુએસએ, સ્વીડન અને કેનેડામાં પણ નોંધાયા છે. આમાંના મોટાભાગના દર્દીઓ યુવાન છે અને તેમની પાસે આફ્રિકાની મુસાફરીની કોઈ હિસ્ટ્રી નથી. ફ્રાન્સ, જર્મની, બેલ્જિયમ અને ઓસ્ટ્રેલિયામાં પણ મંકીપોક્સના કેસ નોંધાયા છે.