દુનિયાભરમાં ઝડપથી પ્રસરી રહેલા કોરોના વાઇરસને કારણે દરેક રમતના આયોજન પર બ્રેક લાગી ગઈ છે. ક્રિકેટ હોય કે ફૂટબોલ કે પછી અન્ય કોઈ રમત. તમામ સ્પોર્ટ્સ ઈવેન્ટને અટકાવી દેવામાં આવી છે, પરંતુ એક દેશ એવો છે, જેણે કોરોના વાઇરસ પ્રસરી રહ્યો હોવા છતાં પોતાના દેશમાં ફૂટબોલ લીગ શરૂ કરી દીધી છે.
કોરોના વાઇરસની મહામારીને કારણે દરેક રમતના આયોજન પર બ્રેક લાગી ગઈ
તમામ સ્પોર્ટ્સ ઈવેન્ટને અટકાવી દેવામાં આવી છે
બેલારૂસમાં કોરોનાના 51 કેસ સામે આવ્યા છે, એકેય મોત નહીં
બેલારૂસમાં બેલારુસિયન પ્રીમિયર લીગ શરૂ કરવામાં આવી છે. બેલારૂસમાં કોરોનાના 51 કેસ સામે આવ્યા છે, પરંતુ એકેય મોત થયું નથી.
ગત ગુરુવારે બેલારૂસની રાજધાની મિન્સકમાં બેલારૂસિયન પ્રીમિયર લીગની શરૂઆત થઈ ચૂકી છે. આશ્ચર્યજનક વાત એ છે કે આ મેચ સ્ટેડિયમમાં દર્શકોની હાજરી વચ્ચે શરૂ કરવામાં આવી. એવું પણ નથી કે બેલારૂસમાં કોરોનાના કેસ નથી મળ્યા, પરંતુ બેલારૂસના ફૂટબોલ ફેડરેશન (BFF)નું કહેવું છે કે દેશમાં કોરોનાની સ્થિતિ નિયંત્રણમાં છે.
બેલારૂસ ફૂટબોલ ફેડરેશનના ચેરમેન વ્લાદિમિર બઝાનોવનું કહેવું છે કે ''ટૂર્નામેન્ટ નિયમ કાર્યક્રમ પ્રમાણે જ આયોજિત થશે, કારણ કે દેશમાં કોરોનાની સ્થિતિ નિયંત્રણમાં છે. એવું કયું કારણ છે, જેના કારણે અમે આ લીગને શરૂ ના કરી શકીએ? શું દેશમાં ઈમર્જન્સી જાહેર કરવામાં આવી છે? અહીં જરા પણ ગંભીર સ્થિતિ નથી. આથી જ અમે નિર્ણય કર્યો છે કે નક્કી કરેલા સમય પ્રમાણે જ આ ચેમ્પિયનશિપ શરૂ કરવામાં આવે.''
ઉલ્લેખનીય છે કે યુરોપમાં અનેક મોટી ફૂટબોલ લીગ રદ કરી દેવામાં આવી છે, જેમાં યુરોપ, પ્રીમિયર લીગ, ચેમ્પિયન્સ લીગ, યુરો કપ, યુરોપ લીગ, લા લિગા અને તમામ ઘરેલુ ટૂર્નામેન્ટ સામેલ છે, જે કોરોના વાઇરસને કારણે સ્થિગત કરી દેવામાં આવી છે અથવા રદ કરી નાખવામાં આવી છે.
બીબીએફનું કહેવું છે કે યુરોપમાં તમામ મેચ ખાલી સ્ટેડિયમમાં આયોજિત કરવામા આવી રહી છે, પરંતુ હજારો ચાહકો સ્ટેડિયમની બહાર એકઠા થઈ જાય છે. આ સ્થિતિમાં અમે શું કરીએ?