ધો. 12 સાયન્સની બોર્ડ પરીક્ષા માટે દોઢ લાખ જેટલા વિદ્યાર્થીઓ નોંધાયા છે. ત્યારે આ પરીક્ષા માટેની હોલ ટિકિટ અંગેની વિગતો જાણો કઇ રીતે મેળવી શકાશે.
12 સાયન્સની પરીક્ષાના વિધાર્થીઓ જોગ
દોઢ લાખ વિધાર્થીઓ પરીક્ષા માટે રજીસ્ટર
વિજ્ઞાન પ્રવાહના પ્રેક્ટીકલ આજથી શરુ
અમદાવાદ સહિત રાજ્યભરમાં દોઢ લાખ જેટલા વિદ્યાર્થીઓ ધોરણ 12 સાયન્સની બોર્ડ પરીક્ષા આપવા માટે રજિસ્ટર્ડ થયા છે. ત્યારે ઉચ્ચતર માધ્યમિક બોર્ડ દ્વારા ધોરણ 12 વિજ્ઞાન પ્રવાહના વિધાર્થીઓની પ્રેક્ટિકલ પરીક્ષા આજથી શરૂ થઈ છે.
જેની વિગતો બોર્ડની વેબસાઈટ પર મૂકવામાં આવી છે. આ ઉપરાંત વિધાર્થીઓએ કેવી રીતે પ્રેક્ટિકલ પરીક્ષા માટે હોલ ટિકિટ મેળવવી તેની પણ વિગતો બોર્ડની વેબસાઈટ પર જાહેર કરવામાં આવી છે. રાજ્યમાં ધોરણ 10 અને ધોરણ 12ની બોર્ડની પરીક્ષા યોજાય તે પહેલાં ધોરણ 12 સાયન્સની પ્રેક્ટિકલ પરીક્ષા લેવામાં આવે છે. ગત વર્ષે કોરોનાના કારણે ધોરણ 10 અને ધોરણ 12ની પરીક્ષાઓ રદ કરી માસ પ્રમોશન આપવામાં આવ્યું હતું. ત્યારે કોરોનાકાળ બાદ ધોરણ12 ના વિદ્યાર્થી માટે બોર્ડ દ્વારા લેવામાં આવી રહેલી આ પહેલી પરીક્ષા છે. બોર્ડની વેબસાઇટ sciprac.gsebit.in અથવા gsebht.in અથવા gseb.org પર હોલ ટિકિટ અંગેની વિગતો મૂકવામાં આવી છે.
હોલ ટિકિટ સાથે ઓનલાઇન મૂકવામાં આવેલ પ્રવેશપત્ર વિતરણ યાદીની પ્રિન્ટ કાઢીને પરીક્ષાર્થીને આપ્યા બદલની સહી પરીક્ષાર્થી પાસેથી લેવાની સૂચના બોર્ડ દ્વારા આપવામાં આવી છે. પરીક્ષાર્થીના વિષયો, માધ્યમ કે અન્ય કોઇ વિગતમાં વિસંગતતા જણાય તો બોર્ડની ગાંધીનગર ખાતેની કચેરીની વિજ્ઞાન પ્રવાહ ( ક ) શાખાનો જરૂરી આધાર સાથે સંપર્ક કરવા સૂચના આપવામાં આવી છે.
શિક્ષણ બોર્ડ દ્વારા ધોરણ 12સાયન્સના મહત્વના વિષયોની પ્રાયોગિક પરીક્ષા લેવામાં આવતી હોય છે. આ વખતે આ પ્રાયોગિક પરીક્ષા 14 ફેબ્રુઆરીથી23 ફેબ્રુઆરી દરમિયાન લેવાની જાહેરાત કરાઈ હતી. જોકે, આ વખતે રાજ્યમાં કોરોનાની ત્રીજી લહેર આવતાં સ્કૂલ બંધ કરવામાં આવી હતી. પરિણામે રાજ્ય સરકાર દ્વારા વિદ્યાર્થીઓને પરીક્ષાની તૈયારી માટે પૂરતો સમય મળી રહે તે માટે તમામ પરીક્ષાઓ બે સપ્તાહ પાછળ લઈ જવાની જાહેરાત કરી હતી. જેમાં ધોરણ 12 સાયન્સની પ્રાયોગિક પરીક્ષા પણ 2 માર્ચથી શરૂ કરવાની જાહેરાત કરાઈ હતી. આ પરીક્ષા 12 માર્ચના રોજ પૂર્ણ થશે.