નિવેદન / બજેટ રજૂ કરતાં પહેલા DyCM નીતિન પટેલે 'આત્મનિર્ભર ગુજરાત'ને લઈને આપ્યું મોટું નિવેદન

• આજે ગુજરાતનું બજેટ રજૂ કરશે નીતિન પટેલ 
• બજેટમાં આત્મનિર્ભરતા પર જોર અપાય તેવા સંકેત 
• લોકોને મોંઘવારી અને રોજગારી મુદ્દે સરકારની અપેક્ષા 

આજે વિધાનસભામાં ગુજરાતનું બજેટ રજૂ થશે 

ગુજરાત સરકાર પ્રથમ વખત પેપરલેસ બજેટ રજૂ કરશે અને નીતિન પટેલ આજે 9મી વખત બજેટ આપવા જઈ રહ્યા છે. ખાસ વાત એ છે કે ગુજરાતનું વર્ષ 2021-22નું બજેટ ઓનલાઇન પણ જોઇ શકાશે, અગાઉ સરકારે ઓનલાઈન બજેટ માટે એપ્લિકેશન પણ લોન્ચ કરી છે. 

બજેટ વિકાસલક્ષી હશેઃ નીતિન પટેલ

આજે ગુજરાતનું બજેટ રજૂ કરતાં પહેલા નાયબ મુખ્યમંત્રી નીતિન પટેલે કહ્યું હતું કે આત્મનિર્ભર ગુજરાતની જે યોજના જાહેર કરવામાં આવી છે તેથી ઘણો મોટો ખર્ચ રાજ્ય સરકારે કરવો પડ્યો તેથી તે પ્રમાણે ગુજરાતની જનતાને લાભ મળે તે માટે શક્ય તેટલી જોગવાઈ કરવામાં આવી છે. સાથે જ તેમણે કહ્યું કે આત્મનિર્ભર પેકેજમાં વધુ લાભ આપવામાં આવશે. 

જે રકમ જાહેર થશે તેનાથી દરેક વર્ગને થશે લાભઃ નીતિન પટેલ

વિધાનસભા માટે રવાના થતાં પહેલા નીતિન પટેલે કહ્યું કે બજેટ વિકાસ લક્ષી હશે અને સુખ-શાંતિ જળવાઇ રહે એ પ્રમાણેનું બજેટ હશે. જે રકમ જાહેર થશે તેનાથી દરેક વર્ગને લાભ થશે. સાથે જ ગઇકાલની ચૂંટણી પરિણામને લઈને તેમણે કહ્યું કે ગઇકાલે ચૂંટણીમાં ભાજપને મોટુ સમર્થન મળ્યું તેથી અમારી જવાબદારી વધી છે અને અમે પ્રજા પ્રત્યે વધુ સારા કામ કરીશું. બજેટના માધ્યમથી લોકોને વધુ રાહત આપીશું. 

રોજગારીની તક ઉભી થાય એવી અપેક્ષા

નોંધનીય છે કે આજે બજેટ છે ત્યારે લોકોને ગુજરાતના બજેટથી શું આશા છે તેને જોતાં VTVએ સામાન્ય લોકો સાથે વાતચીત કરી હતી જેમાં ઘણા બધા લોકોએ પેટ્રોલ ડીઝલ સસ્તા થાય તેવી આશા વ્યક્ત કરી હતી, વધતી મોંઘવારી પર અંકુશ આવે તેવી માંગ પણ કરવામાં આવી છે તો ઘણા નાગરિકોએ સિનિયર સીટીઝન માટે આયોજનો થાય તેવી પણ માંગ કરી છે. મોટા ભાગના લોકો પેટ્રોલ ડીઝલના ભાવ તથા રોજગારી પર સરકારથી અપેક્ષા રાખી રહી છે.