ભારતની ડોમેસ્ટિક વનડે ટૂર્નામેન્ટ વિજય હરારે ટ્રોફીની શરુઆત ધમાકેદાર થઈ છે. શનિવારે રમાયેલી એક મેચમાં ઝારખંડનાં કેપ્ટન ઈશાન કિશને શાનદાર બેટીંગનું પ્રદર્શન કર્યું હતું.
ઝારખંડની ટીમે મધ્ય પ્રદેશ સામે 422 રન ખડક્યા
ઈશાન કિશને 94 બોલમાં 173 રન ફટકાર્યા
વરુણ આરોને 37 રન આપી 6 વિકેટ લીધી
422નો જંગી સ્કોર ખડક્યો
ઈંદોરનાં હોલ્કર સ્ટેડિયમમાં રમાયેલ આ મેચમાં મધ્યપ્રદેશે ટોસ જીતીને પહેલા બોલિંગ કરવાનો નિર્ણય કર્યો હતો. ઝારખંડની શરુઆત થોડી નબળી રહી તેની પહેલી વિકેટ ફક્ત 10 રન પર પડી ગઈ હતી. ત્યારબાદ ઇશાન કિશને ધમાકેદાર ઈનિંગ રમીને 94 બોલમાં 173 રન પોતાનાં નામે કર્યાં હતા. જેની મદદથી ઝારખંડની ટીમે 9 વિકેટ 422 રન બનાવ્યા હતા અને જેનાં જવાબમાં મધ્યપ્રદેશની ટીમ ફક્ત 98 રનમાં ઓલઆઉટ થઈ ગઈ હતી. આ મેચમાં ઝારખંડ તરફથી વરુણ આરોને 37 રન આપીને 6 વિકેટ પણ લીધી હતી.
હોલ્કર ક્રિકેટ સ્ટેડિયમમાં આતિશબાઝીવાળી ઈનિંગથી ઈશાન કિશન ચર્ચામાં છવાઈ ગયો હતો. 22 વર્ષનાં આ વિકેટકીપર બેટ્સમેને 19 ચોકા અને 11 છક્કાની મદદથી 173 રન બનાવ્યા હતા. 50 ઓવરની ટૂર્નામેન્ટમાં એલીટ ગ્રૂપ બીની મેચમાં કિશને કુમાર કુશાગ્ર સાથે મળીને 113 રનની ભાગીદારી પણ કરી હતી. પણ તેમાં વધારે રન ઈશાનનાં રહ્યાં હતા. ઉલ્લેખનીય છે કે ઇશાન કિશને ફક્ત 74 બોલમાં શતક પૂરી કરી હતી.
ઈશાન કિશનની શાનદાર ઈનિંગ બાદ આઈપીએલમાં તેની ટીમ મુંબઈ ઈન્ડિયન્સે ટ્વીટ કરીને તેને અભિનંદન પાઠવ્યા હતા. ઇશાન કિશને ગત વર્ષે આઈપીએલમાં પણ મુંબઈ માટે શાનદાર ઈનિંગ્સ રમી હતી. તેણે 14 મેચમાં 516 બનાવ્યા હતા. તે દરમિયાન તેનો બેસ્ટ સ્કોર 99 રન રહ્યો હતો. જેમાં તેણે 7 અર્ધશતક લગાવ્યા હતા. ઈશાન કિશન આઈપીએલમાં ગુજરાત લાયન્સ માટે પણ રમી ચૂક્યો છે.
ઈંગ્લેન્ડ સામે સ્થાન મળી શકે છે
ઈશાન કિશનની શાનદાર ઈનિંગને લીધે તેને ભારત અને ઈંગ્લેન્ડ વચ્ચે રમાનાર વનડે કે ટી-20માં પણ સ્થાન મળી શકે છે. જોકે તે પહેલા ઇશાન બીસીસીઆઈ તરફથી બેંગલુરુ નેશનલ ક્રિકેટ એકેડેમીમાં કરાવવામાં આવેલ ટેસ્ટમાં ફેલ થઈ ગયો હતો. તે ઉપરાંત રાહુલ તેવતિયા, સંજૂ સેમસન, નીતીશ રાણા, સિદ્ધાર્થ કૌલ અને જયદેવ ઉનડકટ પણ તે ટેસ્ટ પાસ નહોતો કરી શક્યો જોકે આ ખેલાડીઓને ફરી એક તક આપવામાં આવશે.