કેન્દ્ર સરકારે કેન્દ્રીય કર્મચારીઓને એક મોટી રાહત આપતા બાળક શિક્ષણ ભથ્થાનો દાવો કરવાના નિયમોમાં છૂટ આપીને નવી કેટલીક રીતો જણાવી છે.
કેન્દ્ર સરકારે કેન્દ્રીય કર્મચારીઓને મોટી રાહત આપી
બાળક શિક્ષણ ભથ્થાના નિયમો સરળ બનાવ્યા
કર્મચારીઓ હવે સ્વ પ્રમાણિત દ્વારા પણ દાવો માંડી શકશે
કર્મચારીઓને દર મહિને મળે છે 2250 રુપિયાનું બાળક શિક્ષણ ભથ્થું
મોંઘવારી ભથ્થા માટે કેન્દ્રીય કર્મચારીઓને ભલે સપ્ટેમ્બર સુધી રાહ જોવી પડે પરંતુ કેન્દ્ર સરકારે તેમને એક મોટી રાહત આપી દીધી છે. કાર્મિક અને પ્રશિક્ષણ વિભાગે બાળ શિક્ષણ ભથ્થાના નિયમોમાં છૂટ આપી દીધી છે.
મંત્રાલયે આપેલી છૂટ અનુસાર હવે કર્મચારીઓ સ્વ પ્રમાણપત્ર, રિપોર્ટ કાર્ડ શુલ્ક ચુકવણી ઈમેઈલ, એસએમએસના પ્રિન્ટઆઉટ દ્વારા પણ બાળ શિક્ષણ ભથ્થાનો દાવો માંડી શકે છે.
કોરોનાને કારણે લેવાયો આ નિયમ
2020-21 દરમિયાન કોરોનાના લોકડાઉનને કારણે સરકારે આવો નિર્ણય લીધો છે. ઉલ્લેખનીય છે કે હાલમાં કેન્દ્રીય કર્મચારીઓને 2250 રુપિયા, પ્રતિ મહિને આ ભથ્થું મળે છે. પરંતુ કોરોનાને કારણે કર્મચારીઓએ આ દાવો માંડવામાં ખૂબ અડચણ આવી રહી છે કારણ કે તેમના બાળકોના પરિણામો, રિપોર્ટ કાર્ડ સ્કૂલો દ્વારા એસએમએસ-ઈમેઈલના માધ્યમ દ્વારા મોકલાયા નહોતા. કર્મચારીઓની આ સમસ્યાને દૂર કરવા માટે ડીઓપીટી વિભાગે આ નવો નિયમ બનાવ્યો છે. હવે કર્મચારીઓ ડીઓપીટી વિભાગ દ્વારા નક્કી થયેલી બીજી રીતે પણ શિક્ષણ ભથ્થાનો દાવો માંડી શકશે.
DA વધારાનો લેટર બહાર પડાયો હતો
જોકે કેન્દ્ર કર્મચારીઓ તથા પેન્શનર્સને ડીએ અને ડીઆરમાં વધારાના પૈસા જુલાઈના પગારમાં નહીં મળે. તેમણે સપ્ટેમ્બર સુધી રાહ જોવી પડશે. નેશનલ કાઉન્સિલ પણ આ અંગે એક લેટર જારી કર્યો છે. આ લેટર જેસીએમ સચિવ શિવ ગોપાલ મિશ્રાની ઓફિસ વતી બહાર પડાયો છે.
DA બહાલી પરનો પ્રતિબંધ ઉઠાવાયો
આ લેટરમાં જણાવ્યા પ્રમાણે, કેબિનેટ સચિવની સાથે 26 જુન 2021 ના રોજ થયેલી બેઠક ઘણી સકારાત્મક રહી છે. બેઠક દરમિયાન કેન્દ્ર સરકારના કર્મચારીઓના હિતમાં ઘણા નિર્ણય લેવાયા છે.
મોંઘવારી ભથ્થા અંગે સૌથી મોટો નિર્ણય લેવાયો છે. ડીએ પરનો નિર્ણય છેલ્લા 18 મહિનાથી પેન્ડીંગ હતો. સરકાર જુલાઈથી ડીએ બહાલ કરશે, જોકે છેલ્લા ત્રણ હપ્તાઓની ચુકવણી જુલાઈમાં થવાની સંભાવના નથી. સચિવ મિશ્રાએ જણાવ્યું કે કેબિનેટ સચિવે કેન્દ્ર સરકારના પેન્શન ભોગીઓએ માટે ડીએ અને મોંઘવારી રાહત પર સસ્પેંશન હટાવવાની તૈયારી દર્શાવી છે.
ત્રણ હપ્તાની ચુકવણી સપ્ટેમ્બરના પગારમાં થશે
કેન્દ્ર સરકારના કર્મચારીઓ અને પેન્શનભોગીઓને જાન્યુઆરી 2020, જુન 2020 તથા જાન્યુઆરી 2021 ના છેલ્લા ત્રણ હપ્તા એકીસાથે મળવાની સંભાવના છે. ત્રણેય હપ્તા સપ્ટેમ્બરમાં આવવાની ધારણા છે. આ દરમિયાન જુન 2021 માટે મોંઘવારી ભથ્થું, જે અંગેના ડેટા જુલાઈ 2021 માં જારી કરવામાં આવશે ,તેને પણ સામેલ કરવામાં આવશે જે કુલ ચુકવણી કરવામાં આવશે તેમાં જુન 2021 ના ડીએની સાથે ડીએના પાછળના ત્રણ હપ્તા પણ સામેલ હશે. સરકાર સપ્ટેમ્બરના પગારની સાથે જુલાઈ અને ઓગસ્ટ 2021 નું એરિયર પણ ચુકવશે.
હવે 28 ટકાથી દર મળશે DA
હાલમાં કેન્દ્ર સરકારના કર્મચારીઓને 17 ટકાથી દરથી મોંઘવારી ભથ્થું મળી રહ્યું છે. ત્રણ હપ્તા સામેલ થયા બાદ મોંઘવારી ભથ્થું 28 ટકા થઈ જશે. જાન્યુઆરી 2020 માં ડીએમાં 4 ટકા અને જુન 2020 માં 3 ટકાનો વધારો કરાયો હતો. જાન્યુઆરી 2021 માં તેમાં 4 ટકાનો વધારો કરાયો હતો. હવે ત્રણ હપ્તાની ચુકવણી થવાની છે એટલે કે કુલ 11 ટકાનો વધારો ડીએમાં થઈ જશે.