મકાન કે ઓફીસ ખરીદતા પહેલા ખાસ ચેક કરવા જોઈએ આ ડોક્યુમેન્ટ નહીંતર પસ્તાવાનો આવશે વારો
મકાન-ઓફિસ ખરીદી પર આ 7 ડોક્યુમેન્ટ ચકાશો
પ્રોપર્ટી ખરીદી પહેલા બિલ્ડર અને જગ્યાની તપાસ કરો
જે જગ્યાની ખરીદી કરો છો તે બિનખેતી હોવી જરૂરી
જો તમે મકાન કે ઓફીસ ખરીદવાનું વિચારી રહ્યા છો ત્યારે તમારા માટે આ ખાસ પોસ્ટ છે, આજકાલ ઘણી જગ્યાએ તમે જોતા હશો કે ગેરકાયદેસર બાંધકામ તોડી પાડ્યું અથવા દબાણ હટાવવામાં આવ્યું છે. ત્યારે ઘણી જગ્યાએ લોકો સાથે એવા પણ ફ્રોડ થયા છે જેમાં એક જ પ્રોપર્ટી એકથી વધુ લોકોને વેચવામાં આવી હોય અથવા તો માલિક કોઈ બીજું હોય અને વેચનાર પણ અલગ વ્યક્તિ હોય છે.
જો તમે કોઈ પણ પ્રોપર્ટીની ખરીદી કરી રહ્યા છો જેમાં ખાસ કરીને મકાન કે ઓફીસની ખરીદી પર આટલા ડોક્યુમેન્ટ પર ખાસ ધ્યાન રાખવું જોઈએ. ચાલો આજે તમને આ ડોક્યુમેન્ટ વિશેની માહિતી આપશું.
આ ડોક્યુમેન્ટ તમારે અવશ્યપણે ચેક કરવા
1. બિન-ખેતી મંજુરી
કોઈ પણ જમીનમાં બાંધકામ પહેલા બિલ્ડરે તે જમીનને બિન-ખેતી છે તેનું પ્રમાણપત્ર મેળવવું પડે છે. ઘણી જમીન ખાલી ઇન્ડસ્ટ્રીયલ ઉપયોગ માટે હોય છે જ્યાં ફક્ત ઇન્ડસ્ટ્રીઝ જ સ્થાપી શકાય. ત્યારે રહેઠાણ માટેની જમીન બિન ખેતી છે કે નહી તે જાણવું પણ જરૂરી છે.
2. પ્રોજેક્ટનો મંજુર થયેલ પ્લાન
સત્તાધિકારી દ્વારા મંજૂર થયેલો બિલ્ડીંગ પ્લાન એ ખાતરી કરવા માટેનો બીજો મુખ્ય મિલકત દસ્તાવેજ છે કે વાસ્તવિક બાંધકામ ઓથોરિટીને જે સબમિટ કરવામાં આવ્યું હતું તે મુજબ છે કે નહી. RERA વેબસાઈટ પરથી બિલ્ડિંગ પ્લાનની નકલ ડાઉનલોડ કરી શકો છો અને ખાતરી કરો કે ડેવલપર ખરેખર ઓન-સાઈટ જે બાંધકામ કરી રહ્યો છે તે સમાન છે. અને જ્યારે બિલ્ડરને બાંધકામ પૂર્ણ કર્યા પછી સ્થાનિક સત્તાધિકારી પોસ્ટ તરફથી બિલ્ડિંગ કમ્પ્લીશન સર્ટિફિકેટ પ્રદાન કરવામાં આવે છે.
3. વેચાણ દસ્તાવેજ
વેચાણ દસ્તાવેજ એ દર્શાવે છે કે જે હાલ બાંધકામ થઇ રહ્યું છે અથવા તો જે બાંધકામ છે એ માલિકી તેમની જ છે કે નહી. જો કોઈ સોસાયટી હોય તો વેચાણ દસ્તાવેજ એ સોસાયટીના નામે હોવો જોઈએ અથવા તો કોઈ વ્યક્તિ બીજાને આ પ્રોપર્ટી વેચી રહ્યું છે તો દસ્તાવેજ મૂળ માલિકના નામે છે તે ખાસ ચકાસવું.
4. 7/12 ના ઉતારામાં બિલ્ડરનું નામ
જયારે પણ પ્રોપર્ટી ખરીદી કરો તે પહેલા તે જમીનના 7/12 ના ઉતારામાં બિલ્ડરનું નામ છે કે નહી તે તપાસવું જોઈએ. જો તેમાં વેચાણ કરનાર બિલ્ડરનું નામ ન હોય તો પ્રોપર્ટીનો સોદો કરવો ન જોઈએ.
5. બાનાખત
હંમેશાં જયારે તમારી પ્રોપર્ટી ડેવલપમેન્ટમાં છે ત્યારે ખરીદી કરતા પહેલા બાનાખત બનાવવો જરૂરી છે જેમાં તમે ક્યારે કેટલુ પેમેન્ટ કરશો તમને તમારી પ્રોપર્ટી ક્યારે સોપવામાં આવશે અને તેમાં કેવી કેવી સુવિધાઓ આપવામાં આવશે તેની સંપૂર્ણ માહિતી આપવામાં આવી હોય છે.
6. બિલ્ડીંગ યુઝ પરમિશન(BU)
જયારે તમે રેડી ટુ યુઝ કે રિસેલમાં પ્રોપર્ટી ખરીદી કરો છો ત્યારે તમારે બિલ્ડીંગ યુઝ સર્ટિફિકેટ જરૂર મેળવવું. સરકાર દ્વારા કોઇપણ બિલ્ડીંગને વપરાશમાં લેવા માટે આ સર્ટીફીકેટ આપવામાં આવે છે.
7. શેર સર્ટિફિકેટ
જયારે તમે કોઈ સોસાયટીમાં મકાન ખરીદી કરો છો તો તમારે તે જગ્યાનું શેર સર્ટિફિકેટ મેળવી લેવું જોઈએ. આ શેર સર્ટીફીકેટ સોસાયટી દ્વારા આપવામાં આવે છે જેના લીધે તમે સોસાયટીમાં રહેલી સુવિધાનો ઉપયોગ કરી શકો છો.