રામમંદિરના ચુકાદા પહેલા સુરતના ગામડાઓમાં શંકાસ્પદ ડ્રોન ઉડી રહયું હોવાનું સામે આવ્યું છે. બારડોલી અને પલસાણાના ગામડાઓમાં શંકાસ્પદ ડ્રોન ઉડી રહ્યું હોવાનો વીડિયો સામે આવ્યો છે. ઘણાં સમયથી ડ્રોન ઉડી રહ્યું હોવાનો ગ્રામજનોએ દાવો કર્યો છે.
બારડોલી અને પલસાણાના ગામડાઓમાં ઉડે છે શંકાસ્પદ ડ્રોન
ઘણાં સમયથી ડ્રોન ઉડી રહ્યું હોવાનો ગ્રામજનોનો દાવો
ગ્રામજનો ડ્રોનનો પીછો કરે એટલે ડ્રોન ગૂમ થઈ જાય છે
સુરત જિલ્લાના બારડોલી તાલુકાનાં છેવાડાના ગામોમાં રાત્રિ દરમ્યાન આકાશમાં ઉડતા ડ્રોનને લઈ લોકોમાં ભય સાથે કુતૂહલનો માહોલ જોવા મળી રહ્યો છે. હાલમાં રામમંદિરનો ચુકાદો આવવાનો છે ત્યારે આ પ્રકારની પ્રવૃત્તિને લઈ લોકોમાં ભય ફેલાય એ સ્વાભાવિક છે. બારડોલી બાદ હવે બારડોલીને અડીને આવેલા પલસાણા તાલુકા અને નવસારી જિલ્લાના ગામડાઓમાં પણ રાત્રિ દરમ્યાન શંકાસ્પદ ડ્રોન નજરે પડતાં લોકોમાં અનેક તર્ક વિતર્ક સર્જાયા છે.
મોડી સાંજે ઉડે છે ડ્રોન
બારડોલી તાલુકાના છીત્રા, તરભોણ, નોગામા, પારડી, કુવાડિયા, વાઘેચ સહિતના નવસારી જિલ્લાને અડીને આવેલા ગામોમાં સાંજના સમયે શંકાસ્પદ ડ્રોન નજરે પડી રહ્યા છે. મોડી સાંજે આ વિસ્તારના આકાશમાં ડ્રોન નજરે પડતાં જ ભયનું વાતાવરણ ફેલાય જતું હોય છે.
પલસાણા તાલુકાના ગામોમાં પણ ઉડે છે ડ્રોન
બારડોલી તાલુકા ઉપરાંત હવે આ ડ્રોન પલસાણા તાલુકાનાં એના, ધામદોડ, ગોટિયા, અમલસાડી, પૂણી અને નવસારી જિલ્લાના પેરા સહિતના ગામોમાં પણ નજરે પડતાં આ વિસ્તારોમાં પણ લોકો ભયભીત બન્યા છે. ત્યારે વહીવટી અને પોલીસ તંત્ર સક્રિય બની આ મામલે યોગ્ય તપાસ કરાવે તે જરૂરી બની ગયું છે.
સ્થાનિકોએ પોલીસતંત્રનું ધ્યાન દોર્યુ
સ્થાનિકોએ પોલીસનું ધ્યાન દોર્યું હોવા છતાં આ શંકાસ્પદ ડ્રોન સામે પોલીસ તંત્ર કંઈ પગલા લઈ નથી શકતુ. આજુબાજુના ગ્રામજનો ડ્રોનનો પીછો કરે છે પરંતુ તે પલવારમાં જ ગાયબ થઈ જતાં લોકોમાં પણ કુતૂહલ સર્જાયું છે.
કોણ ઉડાવી રહ્યુ છે ડ્રોન
તો પછી આ ડ્રોન કોણ અને કયા કારણોસર ઉડાવી રહ્યા છે તે અંગે અનેક તર્ક વિતર્ક સર્જાયા છે. નજીકના દિવસોમાં રામમંદિરનો ચુકાદો આવવાનો હોય સમગ્ર દેશમાં વહીવટી તંત્ર દ્વારા કોઈ અનિચ્છનિય બનાવ ન બને તે માટે તકેદારી રાખવામા આવી રહી છે. ત્યારે આ પ્રકારની પ્રવૃત્તિને લઈ લોકોમાં ભય ફેલાય એ સ્વાભાવિક છે.