અમદાવાદના વસ્ત્રાપુરમાંથી નકલી CBI અધિકારીઓની ધરપકડ.બંને શખ્સો ગાંધીનગર CBI ઓફિસમાં કામ કરતા હોવાની ખોટી ઓળખ આપીને ખાનગી ટેલિકોમ કંપનીમાંથી કોલ ડિટેઇલ માટે ગયા હતા
નકલી CBIઅધિકારીઓની ધરપકડ
ખાનગી ટેલિકોમમાં કોલ ડીટેલ માટે ગયા
પોલીસ અને પત્રકારના લોગો વાળું કાર્ડ મળ્યું
અમદાવાદના વસ્ત્રાપુરમાંથી નકલી CBI અધિકારીઓની ધરપકડ કરવામાં આવી છે. વસ્ત્રાપુર પોલીસે આરોપી કિશન મહેતા અને હિતેશ ચોલ્વિયાની ધરપકડ કરી છે..બંને શખ્સો ગાંધીનગર CBI ઓફિસમાં કામ કરતા હોવાની ખોટી ઓળખ આપીને ખાનગી ટેલિકોમ કંપનીમાંથી કોલ ડિટેઇલ મેળવવા ગયા હતા. પરંતુ ટેલિકોમ કંપનીના નોડલ ઓફીસરને શંકા જતા આ મામલે પોલીસને જાણ કરી હતી. વસ્ત્રાપુર પોલીસે હાલ બંને શખ્સોની ધરપકડ કરીને કાયદેસરની કાર્યવાહી હાથ ધરી છે.સાથે જ અન્ય એક શખ્સ વિરૂદ્ધ પણ ગુનો નોંધવામાં આવ્યો છે. બંને આરોપીઓ પાસેથી બનાવટી પોલીસના લોગોવાળું આઈ કાર્ડ અને પત્રકાર તરીકેની ઓળખ આપતું આઈકાર્ડ જપ્ત કર્યું છે.
રિમાન્ડની તજવીજ
અમદાવાદના વસ્ત્રાપુર પોલીસે ફરિયાદ બાદ આરોપી કિશન મહેતા અને હિતેશ ચોલ્વિયાની અટકાયત બાદ પૂછપરછ શરૂ કરી હતી. પ્રાથમિક પૂછપરછ દરમિયાન સામે આવેલી કેટલીક હકીકતમાં બંને આરોપીઓ સામાન્ય નોકરીથી ગુજરાન ચલાવતા હતા. કોલ ડિટેઇલ્સ માંગવા પાછળ તેમના હેતુ અંગે પોલીસે પૂછ પરછ કરતા સામે આવ્યું હતું કે આરોપીની બહેનને કોઈ વ્યક્તિ ફોન કરતા તે નકલી ઓફિસર બની ગયો અને કોલ ડિટેઇલ માંગવા નીકળ્યો હતો.પોલીસને આરોપીઓએ આપેલી થીયરી ગળે ઉતરતી ના હોય ,બંનેના રિમાન્ડ માટે તજવીજ હાથ ધરી છે.