પ્રેરણા / ગામનો વિકાસ કરવો છે તો આ રીતે કરાય, ગામડાં અને કોર્પોરેટે પ્રેરણા લેવી જોઈએ

• CSRથી ગામમાં 100 ટકા શૌચાલય
• ગામમાં જરુર છે ત્યાં રસ્તા પર પેવર બ્લોક પણ નંખાવ્યા
• 6-7 કંપનીઓ સ્કુલબેગ અને કપડાનું વિતરણ કરે છે

ઘણી વખત અનેક કંપનીઓ એક જગ્યાએ એક જ પ્રકારની મદદ કરી પોતાની કોર્પોરેટ સોશિયલ રિસ્પોન્સિબિલિટી (CSR) પુરી કરી દેતી હોય છે. જેના કારણે ઘણીવાર એવું પણ બનતું હોય છે કે મદદ લેનારને તેની જરુર ન પણ હોય. આવું જ કંઇક બેચરાજીમાં થતું હતું. જેથી આ ગામના સરપંચ તથા ગામનાં લોકોએ તેમના ગામમાં સીએસઆર કરવા માંગતી કંપનીઓને પોતાનાં ગામની જરુરિયાતો પ્રમાણે સીએસઆર કરવા કહ્યું. સામે કંપનીઓ પણ એમ કરવા માની ગઇ હતી.

પાણીની અંડરગ્રાઉન્ડ, ઓવર હેડ ટાંકી અને બોરવેલ પણ બનાવડાવી

બેચરાજી ગામની રજીસ્ટર્ડ વસ્તી 14 હજારની આસપાસ છે. ગામની આસપાસ દુનિયાની પ્રખ્યાત કંપનીઓના પ્લાન્ટ આવેલા હોઇ 10 હજાર લોકો આ ગામમાં વ્યવસાય માટે આવીને વસ્યાં છે. જેથી આ ગામને 25 હજાર લોકોને તથા રોજનાં 2 હજાર દર્શનાર્થીઓને પાણી પુરું પાડવું પડે છે. વળી 300થી 400 દુકાનો છે અને મંદિર અને ઉદ્યોગોને લીધે આસપાસનાં 300 ગામોનું આ હબ છે. જેથી પાણીની જરુરિયાત વધતાં તેમને પાણીની ટાંકીની જરુરીયાત સર્જાઇ હતી. આથી ગામમાં સીએસઆર કરવા માંગતી એક ઓટો મોબાઇલ કંપનીને ગ્રામજનોએ કહ્યું કે તમને અમને સીએસઆરમાં પાણીની ટાંકી બનાવી આપી. આજે આ કંપની દ્વારા 1.50 લાખ લીટરની ઓવરહેડ અને 4 લાખ લીટરની અંડરગ્રાઉન્ડ ટાંકી બનાવી આપી છે. તેમજ 12 ફુટ ઉંડો બોર મોટર અને સેક્શન સાથે બનાવી આપ્યો છે.

સીએસઆરથી 100 ટકા ટોઇલેટ યુક્ત ગામ બન્યું

પાણી ઉપરાંત ગામની બીજી જરુરિયાત ટોયલેટની હતી. જેથી જનરલ કોટામાં આવતાં અને આર્થિક રીતે નબળા પરિવારનાં લોકોનો ગામ દ્વારા સર્વે કરી સીએસઆર કરવા માંગતી એક કંપનીને આપી ટોયલેટ બનાવવા કહ્યું. આ કંપનીએ તેમની સીએસઆરમાં આ ગામમાં 600 ટોઇલેટ સરકારી ધારા ધોરણ પ્રમાણે બનાવી આપ્યાં. નવાઇની વાત એ છે કે આ ગામમાં ઘર કાચા મળશે પણ ટોયલેટ પાકા ચણેલાં છે. ટોયલેટ બનાવતી વખતે ગ્રામજનોએ જે ઘરમાં જુવાન બહેન દીકરી છે તેમના ઘરે પહેલા ટોયલેટ બનાવડાવ્યાં.

બાળકોનાં હેલ્થ રિપોર્ટ બનાવી રખાય છે ડિજિટલ ડેટા

આ ગામે એક કંપનીને મનાવી લઇ ગામની શાળાનાં તમામ વિદ્યાર્થીઓનાં હેલ્થ ચેકએપ કરાવી હેલ્થ રિપોર્ટ કાર્ડ બનાવડાવ્યાં છે. જેમાં સ્કુલમાં જનારા બાળકની હેલ્થ હિસ્ટ્રી સ્કુલ અને પરિવાર પાસે રહે છે. દર વર્ષે બાળકોનાં હેલ્થ ચેક અપ કરાવવામાં આવે છે. અહીં તમામ બાળકોનાં હેલ્થનો ડિજિટલ રેકોર્ડ પણ રખાય છે. જેથી બાળકનાં હેલ્થની જાણ સ્કુલ અને પરિવારને રહે. બીજું કે તેને કોઇ હેલ્થ પ્રોબ્લેમ થાય તો ખબર પડે. તેમજ સ્કુલનાં મેદાનમાં બાળકોને પ્રાથનાં માટે લોખંડનો શેડ એક કંપની દ્વારા તૈયાર કરાવાઇ રહ્યો છે.

અહીં સફાઇ માટે સીએસઆરમાં મેનપાવર પણ માંગવામાં આવ્યો છે

ગામમાં બાજુનાં ગામથી આવતી અંદાજે 3.5 કિમીની પાણીની લાઇન જુની હોઇ ખારું પાણી આવતું હતું. જેને કંપનીનાં સીએસઆર ફંડથી બદલાવી નવી લાઇન નાંખી છે. આ ઉપરાંત ગામમાં જરુર છે ત્યાં રસ્તા પર પેવર બ્લોક પણ નંખાવ્યા છે. ગામમાં પાણીનું એટીએમ મુકાવ્યું છે. 25 પોઇન્ટ નક્કી કરી સીએસઆરમાં મોટા ડસ્ટબીન કન્ટેનર એક કંપની દ્વારા આપવામાં આવનાર છે. ગામમાં કચરાનાં નિકાલ માટે 2 ટ્રેકટર, 1 રિક્ષા અને 1 છોટા હાથી છે. આ તમામ સાધનો રાજ્ય સરકાર અને મંદિરનાં ટ્રસ્ટથી ભેટમાં મળેલ છે. ત્યાં સુધી કે આ ગામે સફાઇ માટે સીએસઆરમાં કંપની પાસેથી માણસો પણ માંગ્યાં છે.

ગુજરાતની અનોખી ગ્રામ પંચાયત, બાકી વેરો ભરનારને આપે છે મફતમાં હેલમેટ

 

સમસ્યા શોધી અને કંપનીઓને આપી

આસપાસના ગામમાં કંપનીઓ કામ કરે છે. 6-7 કંપનીઓ સ્કુલબેગ અને કપડાનું વિતરણ કરે છે. બધી કંપનીઓ એક જ વિષય પર કામ કરતી હતી. ત્યારે અમે વિચાર્યું કે ગામની જરુરીયાત શું છે એ પહેલા શોધી. પછી નક્કી કર્યું કે જે કંપની અમારા ગામમાં સીએસઆર કરવા માંગે છે. તેમને અમે અમારી જરુરીયાત કહી તેમને એ દિશામાં કામ કરવા કહીશું. જેથી તેમની સીએસઆર પણ થાય અને અમને યોગ્ય જરુર મુજબની સુવિધાઓ પણ મળી જાય. - દેવાંગ પંડ્યા, સરપંચ - બેચરાજી

આલેખન- ધર્મિષ્ઠા પટેલ