આ બેટ્સમેને પોતાના ઇન્ટરનેશનલ કરિયરને લાંબુ બનાવવા માટે ક્રિકેટના એક પ્રારૂપમાંથી સન્યાસ લેવાનુ મન બનાવી લીધુ છે. આ ક્રિકેટરનુ નામ તમીમ ઇકબાલ છે જે હાલમાં બાંગ્લાદેશ વન ડે ક્રિકેટ ટીમનો કેપ્ટન પણ છે. તમીમની નજર આ સમયે ભારતમાં ઓક્ટોબરમાં થનાર ટી20 વર્લ્ડકપ પર લાગેલી છે માટે તેણે જલ્દી જ સન્યાસ લેવાનુ નક્કી કરી દીધુ છે.
તમીમ ઇકબાલે કહ્યું કે બેશક મારા મનમાં ટી-20 વર્લ્ડકપ છે. ટુર્નામેન્ટ માત્ર 6 મહિના જ દૂર છે અને હું કંઇ 36 કે 37 વર્ષનો નથી થઇ ગયો કે આ વિશે ન વિચારું. તમીમે કહ્યું કે હું જાણુ છુ કે મારે કેવી રીતે ક્રિકેટ કરિયરને આગળ વધારવુ છે. હું તે પણ જાણુ છુ કે મારે કયા ફોર્મેટમાંથી પહેલા સન્યાસ લેવો છે અને ક્યારે લેવો છે. તમીમ ઇકબાલે 62 ટેસ્ટમાં 4508, 213 વન ડેમાં 7452 અને 78 ટી 20માં 1758 રન બનાવ્યા છે. તેના નામ પર ટોટલ 23 ઇન્ટરનેશનલ શતક અને 85 અર્ધશતક છે.
ટીમ ઇન્ડિયાને ધોઇ હતી
તમીમે ફેબ્રુઆરી 2007માં બાંગ્લાદેશ માટે વન ડે ક્રિકેટમાં ડેબ્યુ કર્યુ હતુ. તેના એક મહિનાની અંદર જ પાંચમી મૅચ રમતા ટીમ ઇન્ડિયાને કારમી હાર આપી હતી. વેસ્ટઇન્ડિઝમાં 2007માં થયેલા વર્લ્ડકપમાં સચિન તેંડુલકર, સૌરવ ગાંગુલી, વિરેન્દ્ર સહેવાગ, રાહુલ દ્રવિડ જેવા દિગ્ગજો હોવા છતાં પણ બાંગ્લાદેશ વિરુદ્ધ માત્ર 191 રન જ બનાવી શકી હતી. આ લક્ષ્યને તમીમ ઇકબાલે શાનદાર અર્ધશતક બનાવીને હાસિલ કરી લીધો હતો. તમીમે ઝહીર ખાન, મુનાફ પટેલ, અજીત અગરકર અને હરભજન સિંહ જેવા બોલરોને ધોયા હતા.