આઇપીએલને કારણે ભારતના ઓસ્ટ્રેલિયા પ્રવાસમાં ફેરફાર કરવામાં આવ્યો છે. હવે ભારતીય ટીમ પ્રવાસની શરૂઆત વન ડે શ્રેણીથી કરશે. ટીમ બ્રિસ્બેનમાં સૌથી પહેલાં ત્રણ વન ડે મેચની શ્રેણી રમશે. ત્યાર બાદ ત્રણ ટી-૨૦ મેચની શ્રેણી એડિલેડમાં રમાશે. પ્રવાસના અંતમાં ચાર ટેસ્ટ મેચની શ્રેણીની શરૂઆત એડિલેડમાં ડે-નાઇટ ટેસ્ટથી થશે.
IPLના કારણે ઓસ્ટ્રેલિયા પ્રવાસમાં ફેરફાર
ભારતીય ટીમ પ્રવાસની શરૂઆત વન ડે શ્રેણીથી
ક્રિકેટ ઓસ્ટ્રેલિયા અને બીસીસીઆઇ કાર્યક્રમમાં ફેરફાર કરવા સંમત થઈગયા છે, જોકે હજુ સત્તાવાર જાહેરાત કરવામાં આવી નથી. હજુ બંને બોર્ડ ઓસી.નાં વિભિન્ન રાજ્યોની સરકાર તરફથી મંજૂરી મળવાની રાહ જોઈ રહ્યાં છે. લોકલ ગવર્નમેન્ટ તરફથી મંજૂરી મળ્યા બાદ આ અંગેની સત્તાવાર જાહેરાત કરાશે.
ભારતીય ટીમ ૧૦ નવેમ્બરે આઇપીએલ પૂરી થયા બાદ યુએઈથી સીધી બ્રિસ્બેન જવા રવાના થશે. ટીમ ઇન્ડિયા ૧૪ દિવસ ક્વોરન્ટાઇન રહ્યા બાદ બ્રિસ્બેનમાં જ સૌથી પહેલાં ત્રણ વન ડે મેચની શ્રેણી ૨૫થી નવેમ્બર દરમિયાન રમશે. ત્યાર બાદ એડિલેડમાં તા. ૪થી ૮ ડિસેમ્બર વચ્ચે ત્રણ ટી-૨૦ મેચની શ્રેણી રમાશે. જ્યારે ટેસ્ટ શ્રેણીની શરૂઆત એડિલેડમાં ૧૭થી ૨૧ ડિસેમ્બર દરમિયાન થશે. આ ટીમ ઇન્ડિયાની વિદેશમાં પ્રથમ ડે-નાઇટ ટેસ્ટ મેચ હશે. જ્યારે મેલબર્નમાં પરંપરાગત બોક્સિંગ ડે ટેસ્ટ ૨૬થી ૩૦ ડિસેમ્બર દરમિયાન રમાશે. ત્રીજી ટેસ્ટ ૭થી ૧૧ જાન્યુઆરી દરમિયાન સિડનીમાં રમાશે. અંતિમ ટેસ્ટ મેચ બ્રિસબેનમાં ૧૫થી ૧૯ જાન્યુઆરી દરમિયાન રમાશે.
જૂના કાર્યક્રમ અનુસાર ટીમ ઇન્ડિયા ટી-૨૦ મેચની શ્રેણી ઓક્ટોબરમાં ટી-૨૦ વર્લ્ડકપ પહેલાં રમાવાની હતી. ત્યાર બાદ ત્રણ ડિસેમ્બથી ટેસ્ટ શ્રેણીની શરૂઆત થવાની હતી, પરંતુ કોરોનાને કારણે ટી-૨૦ વર્લ્ડકપનું આયોજન સ્થગિત કરી દેવામાં આવ્યું.