સુંદર તળાવ કદરૂપો વિવાદ: સાડા છ કરોડના ખર્ચે તૈયાર થયેલ તળાવ સપડાયું વિવાદમાં

વિકાસના મીઠા ફળ ક્યારે ચાખવા મળશે તે જલદી કહી શકાતું નથી, પરંતુ વિકાસ પાછળ પાછળ વિવાદ તરત હાજર થઈ જાય છે. વડોદરા શહેરના હરણી-મોટનાથ રોડ પર સાડા છ કરોડના ખર્ચે જાહેર-ખાનગી ભાગીદારીથી તળાવનું બ્યુટિફિકેશન કરવામાં આવ્યું છે. જ્યાં આ તળાવ રાજ્યનું પ્રથમ ગ્રીન તળાવ તરીકે ઓળખાવાની તૈયારી કરી રહ્યુ છે તો પાછળ પાછળ વિવાદ પણ પહોંચી ગયો છે. જોઈએ આ અહેવાલ.

વડોદરા મહાનગર સેવા સદન દ્વારા હરણી-મોટનાથ રોડ ઉપર 7 એકરમાં ફેલાયેલા તળાવનું રૂપિયા 6.50 કરોડના ખર્ચે પીપીપી ધોરણે બ્યુટીફિકેશન કરવામાં આવ્યું છે. તળાવની અંદર કિનારા તરફ 500 રનીંગ મીટરની લાંબી કુદરતી રેષામાંથી બનાવેલી જાળ નાંખવામાં આવી છે. તળાવના કિનારે 50 જાતના 80 હજાર વૃક્ષો અને 30 જાતના છોડ રોપવામાં આવ્યા છે. ગ્રીન તળાવમાં આવનાર પક્ષીઓને જોવા માટે બાઇનોક્યુલર પોઇન્ટ બનાવવામાં આવ્યો છે. શહેરની મધ્યમાં આવેલા સુરસાગરમાં 30 વર્ષ પૂર્વે બનેલી બોટિંગ દુર્ઘટના બન્યા બાદ મોટનાથ તળાવમાં પ્રથમ વખત બોટિંગ શરૂ કરાઇ છે. આ માટે તળાવમાં 15 બોટ મૂકવામાં આવી છે.  જેમાં 10 બોટ પેંડલવાળી અને 2 મશીન બોટ છે. જ્યારે 1 સ્કૂટર બોટ છે, 16 સીટવાળી 1 બોટ અને 8 સીટવાળી 1 પેસેન્જર બોટ મૂકવામાં આવી છે. તળાવના કિનારે આઇ લવ વડોદરા સ્કિન મૂકવામાં આવ્યો છે. જે લોકો માટે આકર્ષણનું કેદ્ર બનશે. શહેરીજનો માટે ફરવા લાયક તૈયાર કરાયેલાં તળાવનું ગુરુવારે લોકાર્પણ કરવામાં આવ્યું હતું.   

તળાવે બ્યુટિફિકેશનની દ્રષ્ટીએ તો મનોહર રંગરૂપ ધારણ કર્યા છે, પરંતુ તળાવના ખાનગીકરણને લઈને વિવાદ છેડાઈ ગયો છે. કેમ કે, કોર્પોરેશને હરણી મોટનાથ તળાવ પીપીપી ધોરણે તૈયાર કર્યું છે. જેથી કોર્પોરેશનને તળાવ ખાનગી ડેવલોપરને 30 વર્ષના ભાડેથી આપી દીધુ છે, જેમાં લોકોને જવા માટે એન્ટ્રી ફી થી લઈ તમામ પ્રકારની ફી ચુકવવી પડશે ત્યારે પાલિકાના વિપક્ષ નેતાએ આ તળાવને ગ્રીન નહી પરંતુ નાણાં ખંખેરનારું તળાવ ગણાવ્યું છે.

મહત્ત્વની વાત છે કે, કોર્પોરેશને ગ્રીન તળાવ બનાવતા પહેલા શહેરના મોટાભાગના તળાવનું બ્યુટીફિકેશન કરવા પાછળ કરોડો ખર્ચી નાખ્યા છે છતાં તળાવો હજી સુંદર બન્યા નથી. ત્યારે રાજયનું પ્રથમ ગ્રીન તળાવ કેટલા સમય સુધી ગ્રીન બની રહેશે તે સવાલ છે.