રાજ્યમાં કાળઝાળ ગરમી પડી રહી છે, જ્યારે લોકોને હજુ પણ વધારે ગરમીમાં શેકાવુ પડશે. હવામાન વિભાગની આગાહી પ્રમાણે આગામી દિવસોમાં ગરમી વધે તેવી શક્યતા છે. ગરમીનો પારો હજુ વધે તેવી શક્યતા હવામાન વિભાગે વ્યક્ત કરી છે.
રાજ્યમાં આગામી દિવસોમાં કાળઝાળ ગરમી માટે તૈયાર રહેજો. આગામી 26થી 28 એપ્રિલ સુધીમાં હવામાન વિભાગે હીટવેવની આગાહી કરી છે. અમદાવાદ,બનાસકાંઠા, સાબરકાંઠા, ગાંધીનગર, વડોદરા, રાજકોટ, સુરેન્દ્રનગર હીટવેવની આગાહી કરાઇ છે.
અમરેલીમાં ગરમ પવન ફૂંકાશે જેથી તાપમાન 44 ડિગ્રી પર પહોંચે તેવી સંભાવના છે. તો આજે હવામાન વિભાગે અમદાવાદમાં ઓરેન્જ એલર્ટ આપ્યું છે. જ્યારે 26 એપ્રિલ બાદ અમદાવાદમાં રેડ એલર્ટ રહેશે.
તમને જણાવીએ કે, અમદાવાદમાં તાપમાન 43.5 ડિગ્રી સુધી પહોંચી રહ્યું છે. ગઈકાલે અમદાવાદ રાજ્યનું સૌથી ગરમ શહેર હતું. તો રાજકોટમાં પણ તાપમાન 42.5 ડિગ્રીએ પોહંચ્યું હતું. તો આ તરફ વડોદરામાં પણ 42 ડિગ્રી સુધી ગરમીનો પારો ચઢ્યો હતો. ગરમીનું પ્રમાણ વધતાં લોકો બપોરના સમયે બહાર નીકળવાનું ટાળી રહ્યા છે. તો શહેરોમાં માર્ગો સૂમસામ દેખાઈ રહ્યા છે. જ્યારે ઠંડીથી રાહત મેળવવા માટે લોકો ઠંડા પીણાની પણ મદદ લઈ રહ્યા છે.
ઉલ્લેખનીય છે કે બપોરના સમયે અમદાવાદમાં તાપમાન 43 ડિગ્રી સુધી પહોંચી રહ્યું છે. જ્યારે ખાસ કરીને બિલ્ડીંગની કન્સ્ટ્રક્શન લાઈનમાં કામ કરતા શ્રમિકોને બપોરના સમયે કામ ન કરવા માટે સૂચના આપવામાં આવી છે. આ સાથે જ ગરમીને પગલે પાણી અને અન્ય સુવિધાઓ પર પણ ખાસ ધ્યાન આપવામાં આવતું હોવાનું જણાવ્યું છે.
મહત્વનું છે કે અમદાવાદમાં સામાન્ય રીતે ગરમીનો પારો 45 ડિગ્રી સુધી પહોંચતો હોય છે, જેને રેડ એલર્ટમાં ગણવામાં આવે છે. 43 ડિગ્રીને પાર તાપમાનનો પારો પહોંચતા જ લોકોને બહાર નીકળવું પણ મુશ્કેલ પડી જાય છે. ત્યારે લોકો પણ ગરમીથી બચવા માટે ઠંડા પીણા અને જ્યુસ,ગોળાનો સહારો લઈ રહ્યા છે.