સાવધાન.. / ઈન્કમટેક્સ રિફંડને અંગે આવો વાયરલ મેસેજ આવે તો એલર્ટ, એક ભૂલ અને ખાતું ખાલી, પોલીસે ચેતવ્યા

ઈન્કમ ટેક્સ રિટર્ન ફાઇલ કરવાની છેલ્લી તારીખ પુરી થઈ ગઈ છે. હવે કરદાતાઓ ટેક્સ રિફંડની રાહ જોઈ રહ્યા છે. ઘણા કરદાતાઓને ટેક્સ રિફંડ સંબંધિત 'ઇન્કમ ટેક્સ રિફંડ ડ્યૂ' ના મેસેજ મળી રહ્યા છે. સાયબર સેલ પોલીસ પણ આ મેસેજને લઈને લોકોને ચેતવણી આપી રહી છે. આ એક છેતરપિંડીનો નવો રસ્તો છે. જો તમને પણ આવો કોઈ મેસેજ મળે તો સાવધાન રહેજો અને કોઈ લિંક પર ક્લિક ન કરતા. આવા કોઈપણ મેસેજ આવકવેરા વિભાગ દ્વારા મોકલવામાં આવી રહ્યા નથી.

કોઈપણ લિંક પર ક્લિક કરશો નહીં

નોઈડાની સાઈબર સેલ પોલીસે લોકોને ચેતવણી આપી છે કે તેઓ આવા મેસેજ પર બિલકુલ ભરોસો ન કરે. જો આ મેસેજ પર તમને કોઈ નંબર પર કૉલ કરવાનું કહેવામાં આવે તો તે સ્પામ નંબર છે. જો તમે આ નંબર પર કોલ કરશો તો તમારી ઘણી બધી વિગતો છેતરપિંડી કરનારને પહોચી જશે અને તમે છેતરપિંડીનો શિકાર પણ બની શકો છો. ત્યારે હવે આવી છેતરપિંડીથી બચવા માટે આવા મેસેજ આવે તો કોઈપણ લિંક પર ક્લિક કરશો નહીં.

ઈન્કમ ટેક્સ રિફંડ ડ્યૂના નામે છેતરપિંડી

થોડા દિવસોથી એક મેસેજ ખુબ વાયરલ થઈ રહ્યો છે. આ મેસેજમાં સાયબર ક્રિમિનલ ઈન્કમ ટેક્સ રિફંડ ડ્યૂના નામે એક નંબર આપે છે જેના પર તેને સંપર્ક કરવા કહેવામાં આવે છે. ઘણી વખત મેસેજમાં એક લિંક પણ આપવામાં આવે છે જેને ક્લિક કરવાની સલાહ આપવામાં આવે છે. લોકો આ નંબર પર સંપર્ક કરીને અથવા લિંક પર ક્લિક કરીને છેતરપિંડીનો ભોગ બને છે.

વધુ વાંચો : મા કમાતી હોય તો પણ પિતાએ બાળકના ભરણપોષણ માટે પૈસા આપવા પડશે- HC

ફરિયાદ કરો

જો તમારી સાથે કોઈ સાયબર છેતરપિંડી થાય છે તો તમારે તરત જ બેંકમાં ફરિયાદ કરવી જોઈએ જેથી કરીને એકાઉન્ટ ફ્રીઝ કરી શકાય. આ ઉપરાંત સાયબર સેલમાં પણ ફરિયાદ નોંધાવવી જોઈએ.