Alert / જો તમારી પાસે LICની પોલિસી છે તો સાવધાન થઈ જાઓ, નહીંતર ડૂબી જશે તમારી બચતના પૈસા

• એલઆઈસીના ગ્રાહકો ધ્યાન આપો
• આ રીતે તમારી સાથે થઈ શકે છે મોટી છેતરપિંડી
• પૈસા ન ડૂબે તે માટે કરો આ કામ

દેશમાં ઓનલાઈન ફ્રોડ અને સાઈબર ક્રાઈમના કેસ ઝડપથી વધતા જઈ રહ્યાં છે. કેટલાક ફ્રોડર્સ LIC અધિકારી, એજન્ટ કે વીમા નિયામક IRDAના અધિકારી બનીને ગ્રાહકોને ફોન કરે છે અને મોટી છેતરપિંડી કરી જાય છે. આ કોલમાં તેઓ ઇન્શ્યોરન્સ પોલિસી સંબંધિત ફાયદાઓને જણાવે છે. આ રીતે તેઓ વર્તમાન પોલિસીને સરેન્ડર કરવા માટે ગ્રાહકોને રાજી કરી લે છે. જો તમારી પાસે પણ આ પ્રકારના કોઈ ફોન આવે છે તો તમે તેની ફરિયાદ નોંધાવી શકો છો.

LICના ગ્રાહકોને ભ્રમિત કરવામાં આવી રહ્યા છે

આ ફ્રોડ પોલિસી સરેન્ડર કરાવીને સારું રિટર્ન આપવાનું કહીને ગ્રાહકો પાસેથી પૈસા વસૂલ કરવામાં આવે છે. જ્યારે કેટલાક ગ્રાહકો દ્વારા સરેન્ડર કરવામાં આવેલી રકમને ખોટા વાયદા કરીને અન્ય સ્થળે રોકાણ કરાવી દે છે. આ પ્રકારે કંપનીના પ્રતિનિધિ બનીને પોલિસી હોલ્ડર્સને ગેરમાર્ગે દોરવામાં આવી રહ્યાં છે.

ફેક કોલથી સાવધાન

LICએ પોતાના તરફથી જાહેર કરવામાં આવેલા એલર્ટમાં સ્પષ્ટ કર્યું છે કે કંપની પોતાના ગ્રાહકોને કોઈ પણ પોલિસી સરેન્ડર કરવાની સલાહ નથી આપતી. કંપનીએ ગ્રાહકોને અપીલ કરી છે કે કોઈ અજાણ્યા નંબરથી આવતા ફોન કોલ્સને અટેન્ડ ન કરો. LICએ ગ્રાહકોને સલાહ આપી છે કે તેઓ પોતાની પોલિસીને LICની ઓફિશિયલ વેબસાઇટ પર રજિસ્ટર કરાવી લે અને ત્યાં તમામ જાણકારીઓ ઉપલબ્ધ થશે.

આ બાબતોનું પણ રાખો ધ્યાન

• કોઈ એવા એજન્ટ પાસેથી જ પોલિસી ખરીદો જેની પાસે IRDA દ્વારા આપવામાં આવેલું લાઇસન્સ હોય કે LIC દ્વારા જાહેર કરવામાં આવેલું આઇડી કાર્ડ હોય.
• આ ઉપરાંત જો કોઈ ગ્રાહકને કોઈ ભ્રામક કોલ્સ આવે છે તો તેઓ [email protected] પર ઈમેલ કરીને ફરિયાદ નોંધાવી શકે છે.
• ગ્રાહકોની પાસે LICની વેબસાઇટ પર જઈને ગ્રીવાન્સ રિડ્રેસલ ઓફિસરની વિગતો લઈને તેમનો સંપર્ક કરવાનો વિકલ્પ છે.