IPL / પ્લેઓફની ચાર મેચમાંથી BCCI 20 કરોડની તગડી કમાણી કરશે

BCCIને IPLના પ્લેઓફની ટિકિટ વેચાણમાંથી રૂ. 20 કરોડની અધધ કમાણી થવાની આશા છે. ગ્રૂપ સ્તરની રમાયેલી મેચોની ટિકિટ વહેંચણીનાં નાણાં જે તે ફ્રેંચાઇઝીઓને મળે છે, જ્યારે અંતિમ ચાર મુકાબલાનાં નાણાં BCCIને આપવામાં આવે છે. IPLની ફાઇનલ મેચ 12 મેએ રમાય એ પહેલાં પ્લેઓફની મેચ યોજાશે. BCCIએ IPL-12 માટે નક્કી કરેલા બજેટમાં એવું દર્શાવ્યું છે કે 2018માં ટિકિટના વેચાણથી જે આવક થઈ હતી તેમાં આ વખતે રૂ. 2 કરોડનો વધારો થશે. ગત IPLના ટિકિટ વેચાણથી BCCIને રૂ. ૧૮ કરોડ મળ્યા હતા. 

વર્તમાન સિઝનની ફાઇનલ 12 મેએ હૈદરાબાદના રાજીવ ગાંધી ઇન્ટરનેશનલ સ્ટેડિયમમાં રમાશે, જ્યારે ક્વોલિફાયર-1 તા. 7 મેએ ચેન્નઈમાં અને ક્વોલિફાયર-2 તેમજ એલિમિનેટર વિશાખાપટ્ટનમમાં ક્રમશઃ તા. 8 અને 9 મેએ રમાશે. તામિલનાડુ ક્રિકેટ એસોસિયેશનને 'આઇ', 'જે' અને 'કે' સ્ટેન્ડ ખોલવાની મંજૂરી ના મળતાં ફાઇનલ મેચ ચેન્નઈથી ખસેડીને હૈદરાબાદના આયોજિત કરવાનો નિર્ણય લેવામાં આવ્યો હતો. 

સામાન્ય રીતે પ્લેઓફ મુકાબલા વર્તમાન વિજેતા અને ફાઇનલ સુધી પહોંચનારી ટીમના હોમગ્રાઉન્ડ પર રમાય છે, પરંતુ કેટલીક મુશ્કેલીઓને કારણે BCCIએ વિશાખાપટ્ટનમમાં મેચ આયોજિન કરવાનો નિર્ણય લેવો પડ્યો છે.

સુપ્રીમ કોર્ટ દ્વારા નીમાયેલી વહીવટદારોની સમિતિ (CoA)ના પ્રમુખ વિનોદ રાયે કહ્યું હતું કે પ્લેઓફ મુકાબલાને ખસેડવા પડશે,  કારણ કે આ મેચોના ટિકિટ વેચાણ પર બોર્ડને વિશેષાધિકાર છે. ટીએનસીએને ત્રણ સ્ટેન્ડ ખોલવાની મંજૂરી મળી ન હોવાથી આ મેચો ચેન્નઈથી ખસેડવાની ફરજ પડી છે.

ભારતની 2018-19ની સિઝનમાં 2000થી વધુ મેચ રમાઈ:

ભારતની 2018-19ની સિઝન IPL ફાઇનલની સાથે પૂરી થઈ જશે. BCCI તરફથી આ સિઝન અંગે જણાવાયું કે આ વખતે ભારતમાં કુલ 2024 મેચ રમાઇ, 37 ટીમ તરફથી 6471  ખેલાડીઓ મેદાનમાં ઊતર્યા. મેચોની સંખ્યા ગતની સિઝનની સરખામણીએ 50.92 % વધારે રહી. 2017-18માં 28 ટીમ 1032 મેચ રમી હતી. વર્તમાન સિઝનમાં 3444 દિવસ ક્રિકેટ મેચ રમાઈ. આ આંકડો ગત સિઝનમાં 1892 દિવસનો હતો. આ વખતે ડોમેસ્ટિક સિઝન 2017-18ની સરખામણીમાં ખૂબ મોટી રહી. વર્તમાન સિઝનનું સમાપન રાંચીમાં મહિલા અન્ડર-૨૩ ચેલેન્જર ટ્રોફીની ફાઇનલ સાથે થયું. 

170 વીડિયો એનાલિસ્ટ અને સ્કોરર સામેલ:

વર્તમાન સિઝન માટે 13015 ખેલાડીઓએ રજીસ્ટ્રેશન કરાવ્યું હતું. દેશનાં 100થી વધુ શહેરોમાં સિનિયર અને અન્ય ઉંમર વર્ગની મેચ રમાઈ. બોર્ડે આ દરમિયાન 170 વીડિયો એનાલિસ્ટ અને એટલા સ્કોરરની સેવાઓ પણ લીધી હતી. આ જ કારણે બોર્ડની સત્તાવાર વેબસાઇટ પર તમામ મેચનું લાઇવ સ્કોરિંગ થઈ શક્યું હતું.