ભારતીય ક્રિકેટને વધારેમાં વધારે લોકો સુધી પહોંચાડવાનાં ઉદ્દેશ્યથી બીસીસીઆઇએ મંગળવારનાં રોજ ઑલ ઇન્ડીયા રેડિયો સાથે બે વર્ષનાં કરાર કર્યા છે. આ કરાર અંતર્ગત ક્રિકેટપ્રેમીઓને તેમની પસંદગીની રમત અને મેચોની કોમેન્ટ્રી રેડિયો પર લાઇવ સાંભળવાનો મોકો મળશે.
બીસીસીઆઇ (BCCI) એ પોતાનાં નિવેદનમાં કહ્યું કે, ઑલ ઇન્ડીયા રેડિયો (All india radio) સાથે તેમની બે વર્ષની ભાગેદારી થઇ છે. બોર્ડે કહ્યું કે, દક્ષિણ આફ્રીકા સાથે યોજાનારી ટી-20 સીરીઝ સાથે રેડિયો કોમેન્ટ્રી શરૂ થઇ જશે.
તમને જણાવી દઇએ કે ભારત અને દક્ષિણ આફ્રીકાની વચ્ચે ત્રણ મેચોની ટી-20 સીરીઝની પ્રથમ મેચ 15 સપ્ટેમ્બરનાં રોજ ધર્મશાળામાં રમાવા જઇ રહી છે. આ મેચની લાઇવ કોમેન્ટ્રી રમતપ્રેમીઓને રેડિયો પર સાંભળવા મળશે. આ સિવાય એઆઇઆર પુરૂષ અને મહિલા ઘરેલુ ટૂર્નામેન્ટનું પણ રેડિયો કવરેજ કરશે.
બીસીસીઆઇ સાથે તેમનાં બે વર્ષનો કરાર આ વર્ષે 10 સપ્ટેમ્બરથી શરૂ થશે અને 31 ઓગસ્ટ, 2021 સુધી શરૂ રહેશે. ભારતની ઇન્ટરનેશનલ મેચો સિવાય એઆઇઆર દલીપ ટ્રૉફી, દેવધર ટ્રૉફી, મહિલા ચેલેન્જર સીરીઝ, સૈયદ મુશ્તાક અલી ટ્રૉફી સુપર લીગ અને ઇરાની ટ્રૉફી (પુરૂષ) ની રેડિયો કોમેન્ટ્રી પણ કરશે.