ભારતમાં 1 જૂનથી લૉકડાઉનમાં છૂટછાટ આપાઇ છે. હવે લોકો તેમના પ્રિય ગેમ ક્રિકેટ ક્યારે શરૂ થશે તેની રાહ જોઇને બેઠા છે. લૉકડાઉનમાં ઘણી ચર્ચા થઇ પરંતુ ક્રિકેટ રમવા પર કોઇ ફાઇનલ નિર્ણય લેવાયો નહી. હવે BCCI ભારતીય ટીમ માટે સુરક્ષિત સ્થળ શોધી રહી છે.
ક્યારે રમાશે ક્રિકેટ
ટેસ્ટ કે T-20 ?
ઈંગ્લેન્ડ, ઓસ્ટ્રેલિયા અને વિન્ડીઝના ક્રિકેટરોએ પ્રેક્ટિસ શરૂ કરી દીધી છે, પરંતુ ટીમ ઇન્ડિયાના ખેલાડી હજુ પણ પોતપોતાના ઘરમાં જ છે. BCCIએ ખેલાડીઓને વ્યક્તિગત રીતે આઉટડોર પ્રેક્ટિસ માટે તો કહી દીધું છે, પરંતુ તેમને એ ખબર નથી કે આખી ટીમ સાથે મળીને ક્યારથી અને ક્યાં પ્રેક્ટિસ કરશે. BCCIના કોષાધ્યક્ષ અરુણ ધૂમલે કહ્યું, ''અમે ટોચના ક્રિકેટરો માટે પ્રેક્ટિસ કેમ્પ આયોજિત કરવા અંગે કામ કરી રહ્યા છીએ, પરંતુ હજુ તેનો સમય નક્કી નથી થઈ શક્યો.''
અરુણ ધૂમલે વધુમાં જણાવ્યું કે, ''રાષ્ટ્રીય શિબિર શરૂ કરવા અંગે વાત ચાલી રહી છે. ક્રિકેટ કમિટી અને એનસીએ સ્ટાફ એ અંગે કામ કરી રહ્યાં છે. અલગ અલગ રાજ્યમાં લૉકડાઉનમાં છૂટછાટ સંબંધી અલગ અલગ નિયમ છે. અમારે એ નિયમો અનુસાર નિર્ણય કરવો પડશે. દરેક ખેલાડી અલગ અલગ રાજ્યના છે. જ્યાં સુધી આખી ટીમ એકસાથે ના આવે ત્યાં સુધી તેઓ પોતાના રાજ્ય ક્રિકેટ સંઘ સાથે સંકલન સાધી પ્રેક્ટિસ કરી શકે છે.''
ઈંગ્લેન્ડના ક્રિકેટરોએ નાના નાના જૂથમાં પ્રેક્ટિસ શરૂ કરી દીધી છે. ઓસ્ટ્રેલિયાના ટોચના ક્રિકેટરો ડેવિડ વોર્નર અને સ્ટીવ સ્મિથે ગઈ કાલે ન્યૂ સાઉથ વેલ્સ સાથે પ્રેક્ટિસ સેશનમાં ભાગ લીધો. ભારતમાં ઘરેલુ વિમાન સેવા શરૂ થઈ ચૂકી છે. ધૂમલે જણાવ્યું, ''બોર્ડ રાષ્ટ્રીય શિબિર માટે એવી જગ્યા શોધશે, જ્યાં ખેલાડીઓની સુરક્ષાની પૂરેપૂરી ગેરન્ટી હોય. વિમાન સેવા શરૂ થઈ છે. અમારે એ જોવું પડશે કે પરિસ્થિતિ કેવી રહે છે અને એવી સુરક્ષિત જગ્યા શોધવી પડશે, જ્યાં ખેલાડીઓ સુરક્ષિત રહી શકે.''
હવે સૌથી મોટો સવાલ એ છે કે દેશમાં આવી સુરક્ષિત જગ્યા કઈ છે? સમગ્ર દેશમાં કોરોના ફેલાયેલો છે. મુંબઈ, બેંગલુરુ, દિલ્હીમાં તો પરિસ્થિતિ ખરાબ છે, જોકે ધૂમલે નિવેદન આપ્યું હતું કે, ''ટીમ ઇન્ડિયા ઇચ્છે તો ધર્મશાલાના મેદાનમાં પોતાનો પ્રેક્ટિસ કેમ્પ લગાવી શકે છે. ધર્મશાલામાં કોરોનાની એટલી ખરાબ અસર નથી.''
ઉલ્લેખનીય છે કે ઓસ્ટ્રેલિયાએ ટીમ ઇન્ડિયા સામેની શ્રેણીનો કાર્યક્રમ જાહેર કરી દીધો છે. ઓસ્ટ્રેલિયા પ્રવાસની શરૂઆત ઓક્ટોબરમાં ટી-૨૦ શ્રેણી સાથે થવાની છે. આ સ્થિતિમાં ટીમ ઇન્ડિયાએ બહુ જલદી પ્રેક્ટિસ શરૂ કરવી પડશે.