16 ઓક્ટોબરથી ઓસ્ટ્રેલિયામાં ટી20 વર્લ્ડ કપનો પ્રારંભ થઈ રહ્યો છે અને તે પહેલા ભારતીય ક્રિકેટ ટીમ માટે નવી જર્સી બહાર પાડી દેવાઈ છે.
T20 વર્લ્ડ કપ પહેલા ટીમ ઈન્ડીયા માટે બહાર પડી નવી જર્સી
જર્સીનો રંગ આસમાની વાદળી, ખભા પર ડાર્ક બ્લુ કલર
16 ઓક્ટોબરથી ઓસ્ટ્રેલિયામાં શરુ થઈ રહ્યો છે ટી20 વર્લ્ડ કપ
ઓસ્ટ્રેલિયામાં 16 ઓક્ટોબરથી ટી20 વર્લ્ડ કપ શરુ થઈ રહ્યો છે અને આ વર્લ્ડ કપમાં ભારતીય ખેલાડીઓ એક નવી જર્સીમાં જોવા મળશે. ભારતીય ક્રિકેટ કન્ટ્રોલ બોર્ડે ટીમ ઈન્ડીયાની નવી જર્સી બહાર પાડી છે જે પહેરીને ખેલાડીઓ ટી20 વર્લ્ડ કપ રમશે. ભારતીય ક્રિકેટ ટીમની ઓફિશિયલ કિટ પાર્ટનર એમપીએલ સ્પોર્ટ્સ દ્વારા રવિવારના રોજ મુંબઇમાં જર્સી લોન્ચ કરવામાં આવી હતી. ગત વખતે ટી-20 વર્લ્ડ કપમાં ભારતીય ટીમની જર્સી સંપૂર્ણપણે નેવી બ્લુ કલરની હતી. પરંતુ આ વખતે જર્સીનો રંગ આસમાની વાદળી છે. આ સાથે તેના ખભા પર ડાર્ક બ્લુ કલર સામેલ છે.
BCCI introduces the new T20 jersey of the Indian cricket team.
ભારતીય મહિલા ટીમ પણ આ જ જર્સી પહેરીને રમશે
બીસીસીઆઈએ જે નવી જર્સી જાહેર કરી છે જે ભારતીય મહિલા ટીમને પણ લાગુ પડશે. એટલે કે ટી-20માં ભારતીય મહિલા ટીમની જર્સીનો રંગ પણ આવો જ રહેવાનો છે. બીસીસીઆઈએ નવી જર્સીને લઈને ટ્વીટ કર્યું, "આ દરેક ક્રિકેટ ચાહક માટે છે, આ તમારા માટે છે. આ રહી નવી ટી20 જર્સી - વન બ્લૂ જર્સી.
ટી-20 વર્લ્ડ કપ માટે 12 સપ્ટેમ્બરે ટીમ ઈન્ડિયાની જાહેરાત કરાઈ હતી
ટી-20 વર્લ્ડ કપ માટે 12 સપ્ટેમ્બરે ટીમ ઈન્ડિયાની જાહેરાત કરવામાં આવી હતી. એશિયા કપની હારમાંથી બોધપાઠ લેતાં બીસીસીઆઇએ હાર્દિક પંડયા સહિત પાંચ ફાસ્ટ બોલરોને સ્થાન આપ્યું છે. જસપ્રિત બુમરાહ અને હર્ષલ પટેલ ફિટ થયા બાદ ટીમમાં પરત ફર્યા છે. બુમરાહ પીઠની સમસ્યાને કારણે એશિયા કપમાંથી બહાર થઈ ગયો હતો, જ્યારે હર્ષલ પટેલ પાંસળીની ઈજાના કારણે એશિયા કપ ચૂકી ગયો હતો. બંને ખેલાડીઓએ એનસીએમાં રિહેબ કરાવ્યું છે. હવે બંને ખેલાડીઓની વાપસીથી ટીમને ઘણી તાકાત મળશે.
ટી-20 વર્લ્ડ કપમાં ભારતનો સંપૂર્ણ કાર્યક્રમ-
17 ઓક્ટોબર- ભારત વિરુદ્ધ ઓસ્ટ્રેલિયા (વોર્મ-અપ મેચ) સવારે 9.30 થી
19 ઓક્ટોબર- ભારત વિરુદ્ધ ન્યૂઝીલેન્ડ (વોર્મ-અપ મેચ) બપોરે 1.30 વાગ્યે
23 ઓક્ટોબર- ભારત વિરુદ્ધ પાકિસ્તાન
27 ઓક્ટોબર - ભારત વિરુદ્ધ એ2
30 ઓક્ટોબર - ભારત વિરુદ્ધ દક્ષિણ આફ્રિકા
2 નવેમ્બર - ભારત વિરુદ્ધ બાંગ્લાદેશ
6 નવેમ્બર - ભારત વિરુદ્ધ બી1