BCCIના કોષાધ્યક્ષ અરુણ ધૂમલે IPLની સફળતાનું રિપોર્ટ કાર્ડ શેર કર્યું છે.મુંબઈ ઇન્ડિયન્સ અને ચેન્નઈ સુપર કિંગ્સ વચ્ચે ઓપનિંગ મેચની ટીઆરપી સૌથી વધુ રહી હતી.
IPLને ટીવી પર જોનારા ચાહકોની સંખ્યામાં ૨૫ ટકા જેટલો વધારો
પાંચ વર્ષની બ્રોડકાસ્ટ ડીલને બચાવવામાં સફળ
આ વર્ષે IPLથી ચાર હજાર કરોડ રૂપિયા મળ્યા
કોરોના મહામારી વચ્ચે BCCI IPLની ૧૩મી સિઝનનું સફળ આયોજન યુએઈ ખાતે કરવામાં સફળ રહી. આ વર્ષે રમાયેલી IPLથી BCCIને ચાર હજાર કરોડ રૂપિયાની રેવન્યૂ પ્રાપ્ત થઈ છે એટલું જ નહીં, ગત વર્ષની સરખામણીએ IPLને ટીવી પર જોનારા ચાહકોની સંખ્યામાં ૨૫ ટકા જેટલો વધારો પણ થયો. કોરોનાના જોખમ વચ્ચે ખેલાડીઓ અને સ્ટાફને સુરક્ષિત રાખવો આસાન નહોતો. આ જ વાતને નજરમાં રાખીને BCCIએ ૧૮૦૦ લોકોના ૩૦,૦૦૦ આરટીપીસીઆર ટેસ્ટ કરાવ્યા. ૬૦ દિવસ સુધી ચાલેલી આ ટૂર્નામેન્ટમાં કોરોનાનો એક પણ મામલો સામે આવ્યો નહીં.
BCCIના કોષાધ્યક્ષ અરુણ ધૂમલે IPLની સફળતાનું રિપોર્ટ કાર્ડ શેર કર્યું છે. આ વર્ષે ફેબ્રુઆરીથી આખી દુનિયામાં કોરોનાનો કહેર વધવાનો શરૂ થયો હતો અને છેલ્લા છ મહિનામાં IPL પહેલી એવી ટૂર્નામેન્ટ હતી, જેનું આયોજન આટલા મોટા પાયે થયું હતું.
BCCIએ જોકે IPLથી થયેલી કમાણી અંગે બહુ જાણકારી આપી નથી, પરંતુ સફળ આયોજનની સાથે જ બોર્ડ સ્ટાર ચેનલ સાથે થયેલાં પાંચ વર્ષની બ્રોડકાસ્ટ ડીલને બચાવવામાં સફળ રહ્યું. સ્ટારે BCCIને પાંચ વર્ષ માટે રૂ. ૧૬,૩૪૭ કરોડ ચૂકવ્યા છે.
ધૂમલે જણાવ્યું, ''બોર્ડ ગત વર્ષના ખર્ચમાં ૩૫ ટકા કાપ મૂકવામાં સફળ રહ્યું. આ વર્ષે IPLથી ચાર હજાર કરોડ રૂપિયા મળ્યા અને ટીવી પર પણ ૨૫ ટકા દર્શકો વધુ મળ્યા. મુંબઈ ઇન્ડિયન્સ અને ચેન્નઈ સુપર કિંગ્સ વચ્ચે ઓપનિંગ મેચની ટીઆરપી સૌથી વધુ રહી હતી.''
ઉલ્લેખનીય છે કે BCCIને IPLની ૧૩મી સિઝનના યજમાન માટે યુએઈ ઉપરાંત શ્રીલંકા તરફથી પણ ઓફર મળી હતી, પરંતુ યુએઈ પાસે પહેલાંથી જ IPL યોજવાનો અનુભવ હતો, તેથી બોર્ડે યજમાન તરીકે યુએઈ પર પસંદગીનો કળશ ઢોળ્યો હતો.