ખુશખબર / IPLનાં ચાહકો માટે સૌથી મોટા સમાચાર : આ મહિનામાં યોજાઈ શકે છે ટૂર્નામેન્ટ, જરૂર પડી તો વિદેશમાં રમાશે મેચ

• ગમે તે કિંમતે IPLનું આયોજન કરવા તૈયાર બોર્ડ 
• જુલાઈમાં આયોજન થાય તો ટોક્યો ઓલમ્પિક સાથે ટકકર થશે 
• જરૂર પડી તો વિદેશમાં પણ કરી શકાય છે આયોજન 

સૂત્રોનું માનીએ તો IPLનું આયોજન જુલાઈથી સપ્ટેમ્બર દરમિયાન કરી શકાય છે. 24મી જુલાઈથી શરુ થઇ રહેલ ટોક્યો ઓલમ્પિકની સાથે જ IPLનું આયોજન કરી શકાય છે. 

નોંધનીય છે કે કોરોના વાયરસનાં કારણે દેશભરમાં કોહરામ જેવી પરિસ્થિતિ છે. વિવિધ રાજ્ય સરકારો દ્વારા શાળા-કોલેજ સહીત મોલ-મલ્ટીપ્લેકસ બંધ કરવાના આદેશ આપવામાં આવ્યા છે. કોરોના વાયરસનાં કારણે ભારતે વિદેશીઓના વિઝા પણ રદ્દ કરી દીધા છે. આ બધી જ વિપરીત પરિસ્થિતિમાં IPLનું આયોજન કરવું અસંભવ છે. સૌરવ ગાંગુલીએ થોડા દિવસ પહેલાં એમ પણ કહ્યું હતું કે આઈપીએલનું આયોજન થશે તો તો ટૂંકી ટૂર્નામેન્ટ થશે પરંતુ હવે લાગે છે કે બોર્ડ તમામ 60 મેચ યોજવા માટે તૈયાર છે. 

અહેવાલો મુજબ બોર્ડ આ વર્ષે આઈપીએલ રદ્દ કરવા માંગતી નથી. આ વર્ષે એશિયા કપ અને ઈંગલેન્ડ-પાકિસ્તાનની સીરીઝ સિવાય કોઈ મોટી ક્રિકેટ સીરીઝ નથી. એવામાં વિદેશી ખેલાડીઓ પણ આ સમયમાં ઉપલબ્ધ રહી શકે છે. ભારતે જૂન-જુલાઈમાં શ્રીલંકા સામે સીરીઝ રમવાની છે. જો IPLનું આયોજન જુલાઈમાં થશે તો ટોક્યો ઓલમ્પિક સાથે તેની ટક્કર થશે. 

એટલું જ નહીં જરૂર પડશે તો IPLનું આયોજન બીજા દેશમાં પણ કરી શકાય છે. વર્ષ 2009માં IPLનું આયોજન સાઉથ આફ્રિકામાં કરવામાં આવ્યું હતું. ત્યારે આઈપીએલ 37 દિવસમાં સમાપ્ત થઇ ગઈ હતી.