ગુજરાત ડ્રગ્સનું હબ બન્યું હોવાની ચર્ચા વચ્ચે વડોદરા પોલીસે યુવાધનને બરબાદ કરતાં 4 યુવક યુવતીઓનાં એક ગ્રૂપને નાર્કોટિક્સનાં જથ્થા સાથે ઝડપી પાડ્યું છે. વડોદરાનાં આ ગ્રુપે વડોદરા ઉપરાંત વલ્લભ વિદ્યાનગરમાં સંખ્યાબંધ યુવક યુવતીઓને ડ્રગ્સ સપ્લાય કરી બરબાદીની રાહે ધકેલ્યાં હોવાનો ચોંકાવનારો ખુલાસો થયો છે.
વડોદરા પોલીસે ડ્રગ્સ કૌભાંડ ઝડપી પાડ્યું
ડ્રગ્સ વેચતા 4 શખ્સોની કરી ધરપકડ
નાર્કોટિક્સના જથ્થા સાથે કરી ધરપકડ
ગુજરાતમાં આજકાલ ડ્રગ્સની બોલબાલા છે. છેલ્લા કેટલાંક દિવસથી ગુજરાતનાં અલગ અલગ ભાગોમાંથી કરોડોની કિંમતનું ડ્રગ્સ ઝડપાયું છે અને આ સિલસિલો હજુ યથાવત્ છે. વડોદરા પોલીસે શહેરનાં ઓલ્ડ પાદરા રોડ વિસ્તારમાંથી યુવાનોનાં એક એવાં ગ્રુપની ધરપકડ કરી છે, કે જેઓ છેલ્લાં ઘણાં સમયથી ડ્રગ્સની લત લગાડી યુવાધનને બરબાદ કરવાનાં ધંધામાં લાગ્યાં હતાં.
કોમ્પલેક્ષના બેઝમેન્ટમાં ડ્રગ્સ વેચતા હતા
ગુનાખોરી અટકાવવાની જવાબદારી સંભાળતી વડોદરા પોલીસની પીસીબી શાખાનાં PI જે.જે.પટેલને મળેલી માહિતીને પગલે તેમની ટીમે ઓલ્ડ પાદરા રોડ વિસ્તારમાં આવેલ જાણીતાં આવિષ્કાર કોમ્પ્લેક્ષમાં દરોડા પાડ્યા હતા. જ્યાં કોમ્પ્લેક્સનાં બેઝમેન્ટમાં સાકીબ અને મોહસીના મુન્સી નામનાં ભાઇ-બહેન ચરસ તેમજ ગાંજો રાખી તે યુવાનોને વેચતા હતાં.
ભાઈ-બહેન સહિત બે શખ્સોની ધરપકડ
પોલીસે બંનેને ઝડપી લઇ વધુ પૂછપરછ અને તપાસ કરતાં બંને ભાઇ-બહેન છેલ્લાં એક વર્ષથી નશાનો વેપલો કરતાં હોવાનું અને તે ચરસ અને ગાંજો આણંદનાં ચકલાસી ગામનાં દિલીપ કાકા પાસેથી લાવતાં હોવાનું સામે આવ્યું છે. વડોદરાનાં યુવાધનને બગાડવાનાં ધંધામાં લાગેલ આ બંને ભાઇ-બહેન સાથે માંજલપુરનાં મિત ઠક્કર અને પાણીગેટ રોડ વિસ્તારની નૂપુર સહગલ પણ શામિલ હોવાનું ખુલતાં પોલીસે ચારેય યુવક યુવતીઓની ધરપકડ કરી છે.
દરરોજ 20 જેટલા યુવક-યુવતીઓને આ ગ્રુપ આપતું હતું ચરસ-ગાંજાની પડીકીઓ
મહત્ત્વની વાત એ છે કે, વડોદરામાં નશાનો કારોબાર કરતાં આ ચારેય યુવક યુવતીઓ ઉચ્ચ શિક્ષિત છે. તેમની પાસેથી અત્યાર સુધી વડોદરાનાં સંખ્યાબંધ યુવાનો ચરસ અને ગાંજાની પડીકીઓ લઇ ચુક્યા છે. દરરોજ આશરે 20 જેટલાં યુવક-યુવતી અને આ ગ્રુપ પાસેથી નશાની પડીકીઓ લઇ જતાં હતાં. પોલીસે હવે તેમનાં મોબાઇલ વોટ્સએપ ચેટ અને કોલ ડિટેઇલનાં આધારે તેમની પાસેથી ચરસ ગાંજો લઇ જનાર તમામ વિરૂદ્ધ કાર્યવાહી કરવાની તજવીજ હાથ ધરી છે. વડોદરામાં આ ગ્રુપનાં નશાનાં કારોબારનું નેટવર્ક ખુબ મોટું હોવાનું પોલીસનું માનવું છે.