ન્યાયની માંગ / બાવળા સજ્જડ બંધ: APMCમાં નજીવી બાબતે યુવકની હત્યાના વિરોધમાં કોળી સમાજમાં આક્રોશ

• બંધના એલાનને પગલે બાવળામાં સજ્જડ બંધ
• થોડા દિવસ અગાઉ APMCમાં કોળી સમાજના એક યુવકની થઇ હતી હત્યા
• ક્રિકેટ રમતા શખ્સો સાથે માથાકૂટ થતા કરાયો હતો હુમલો

બાવળામાં થોડાંક દિવસ અગાઉ APMCમાં કોળી સમાજના એક ખેડૂત યુવકની હત્યા થઇ હતી. જે મામલે આજે કોળી સમુદાય દ્વારા બાવળા બંધનું એલાન આપવામાં આવ્યું છે. કોળી સમાજે બાવળા માર્કેટ યાર્ડને બંધનું એલાન આપ્યું છે. હત્યા મામલે જલ્દીમાં જલ્દી ન્યાય મળે તેવી માંગ સાથે ખેડૂતો અને કોળી સમાજ દ્વારા બાવળામાં બંધનું એલાન અપાયું છે. બંધનું એલાન અપાતા આજે માર્કેટમાં તમામ દુકાનો બંધ જોવા મળી.

ક્રિકેટ રમતા શખ્સો સાથે માથાકૂટ થતા ખેડૂત યુવકનું મોત

તમને જણાવી દઇએ કે, થોડાંક દિવસ અગાઉ યાર્ડમાં ક્રિકેટ રમતા શખ્સો સાથે માથાકૂટ થતા આ યુવક પર હુમલો કરાયો હતો. આ માથાકૂટ દરમ્યાન કેટલાંક શખ્સોએ જીવલેણ હુમલો કર્યો હતો. જે હુમલામાં હિંમત પરમાર નામના યુવકનું મોત થયું હતું.

જાણો શું હતી સમગ્ર ઘટના?

ધોળકા તાલુકાનાં રનોડા ગામનાં ખેડૂત હિંમત નરસિંહભાઈ પરમાર 6 તારીખે ટ્રેકટર ડાંગર ભરીને હરાજીમાં વેચવા માટે બાવળા માર્કેટયાર્ડમાં આવ્યા હતાં. દરમ્યાન માર્કેટ યાર્ડમાં ટ્રેક્ટર પાર્ક કરવા માટે ત્યાં ક્રિકેટ રમતાં છોકરાઓ સાથે બોલાચાલી થઇ. આથી છોકરાઓએ તેમનાં સાગરીતોને બોલાવીને બેટ અને સ્ટમ્પથી મારામારી કરતાં હિંમતભાઈનું હોસ્પિટલમાં સારવાર મળે તે પહેલાં જ મોત નિપજ્યું હતું.

આરોપીઓ વિરૂદ્ધ કડકમાં કડક કાર્યવાહી કરવાની માંગ

આથી આરોપીઓ વિરૂદ્ધ કડકમાં કડક કાર્યવાહી નહીં કરવામાં આવે તો સમસ્ત કોળી સમાજ ગાંધી ચિંધ્યા માર્ગે આંદોલન કરશે અને જરૂર પડશે તો બાવળા તાલુકાની સમગ્ર જનતાને સાથે લઈને બાવળા બંધનું એલાન પણ કરવામાં આવશે તેવી ચીમકી ઉચ્ચારવામાં આવી હતી. ત્યારે આજ રોજ કોળી સમુદાય દ્વારા બાવળા બંધનું એલાન આપવામાં આવ્યું છે. બંધના એલાનને પગલે બાવળામાં સજ્જડ બંધનો માહોલ જોવા મળ્યો. બંધનું એલાન પાળતા આજે માર્કેટમાં તમામ દુકાનો બંધ જોવા મળી.