અમદાવાદ સહિત રાજ્યભરની આરટીઓમાં હવે ઇલેક્ટ્રિક અને બેટરી ઓપરેટેડ વાહનો માટે જુદા કલરની નંબર પ્લેટ લાગશે. હાલમાં અમદાવાદ, ગુજરાત સહિત દેશભરમાં હાલમાં ઇલેક્ટ્રિક અને બેટરી ઓપરેટેડ વાહનોનું ચલણ વધી રહ્યું છે.
તેથી આ પ્રકારનાં વાહનો માટે ચોક્કસ કલરની નંબર પ્લેટનો ઉપયોગ કરવા માટે તાજેતરમાં જ રાજ્યના વાહનવ્યવહાર વિભાગે એચ.એસ.આર.પી ના પ્રોજેક્ટ મેનેજર સહિત તમામ આરટીઓને નવો આદેશ કર્યો છે.
આ અંગે એઆરટીઓ એસ એ મોજણીદારે જણાવ્યું હતું કે બેટરી ઓપરેટેડ વાહનોની સ્પીડની મર્યાદા ૨૫ કિલોમીટરથી વધુ હોય છે. હોર્સ પાવર વાળા અને ૨૫૦થી વધારે વોટની બેટરીવાળાં વાહનોને હાઈ સિક્યોરિટી રજિસ્ટ્રેશન પ્લેટ લગાવવામાં આવશે. વિભાગમાંથી સૂચના આવેથી તેનો અમલ કરાશે.
તાજેતરમાં જ કેન્દ્ર સરકારના માર્ગ અને પરિવહન વિભાગ દ્વારા સેન્ટ્રલ મોટર વ્હીકલમાં નવા વિષયોનો ઉમેરો કરવામાં આવ્યો છે અને આ બાબતે ગુજરાત રાજ્યનાં વાહન વ્યવહાર વિભાગ દ્વારા એચએસઆરપીના પ્રોજેક્ટ મેનેજર સહિત રાજ્યની તમામ આરટીઓને તેનો અમલ તાત્કાલિક કરવા જણાવાયું હોવાનું જાણવા મળે છે.
શહેરમાં દર મહિને અંદાજે ૨૦થી ૫૦ બેટરી ઓપરેટેડ વાહનનું વેચાણ થાય છે. હાલમાં અંદાજે બે હજારથી વધુ આવાં વાહનો અમદાવાદમાં છે. બેટરી ઓપરેટેડ વાહનોની કિંમત ૬૦ હજાર આસપાસ છે. આગામી દિવસોમાં બેટરી ઓપરેટેડ બાઈક પણ બજારમાં આવશે વધતાં જતાં વાહનોને અનુલક્ષીને હવે આવાં વાહનોનું રજિસ્ટ્રેશન ફરજિયાત કરાયું છે.