વિશ્વ / ન્યૂયોર્કના હિન્દુ મંદિરમાં તોડફોડ, ભડક્યું ભારતીય દૂતાવાસ, કરી કડક કાર્યવાહીની માંગ

New York Hindu Temple Vandalized : વિદેશમાં ફરી એકવાર મંદીરમાં તોડફોડની ઘટના સામે આવી છે. અમેરિકાના ન્યુયોર્ક સ્થિત BAPS સ્વામી નારાયણ મંદિરમાં તોડફોડનો એક સનસનાટીભર્યો કિસ્સો પ્રકાશમાં આવ્યો છે. એટલું જ નહીં મંદિરમાં PM મોદી વિરુદ્ધ અપશબ્દો પણ લખવામાં આવ્યા હતા. અજાણ્યા હુમલાખોરોએ આ ઘટનાને અંજામ આપ્યો હતો. ન્યૂયોર્કમાં ભારતીય વાણિજ્ય દૂતાવાસે મંદિરની તોડફોડની સખત નિંદા કરી અને કહ્યું કે, તે એક જઘન્ય અપરાધ છે. આ ઘટનામાં સંડોવાયેલા ગુનેગારો સામે વહેલી તકે કાર્યવાહી કરવામાં આવે તેવી માંગ કરવામાં આવી હતી.

BAPS સ્વામી નારાયણ સંસ્થાએ મેલવિલે, ન્યૂયોર્કમાં BAPS સ્વામી નારાયણ મંદિરને ધિક્કારજનક સંદેશાઓ સાથે અપમાનિત કરવાની પણ નિંદા કરી છે. એવો દાવો કરવામાં આવ્યો હતો કે, ઉત્તર અમેરિકાના વિવિધ હિંદુ મંદિરોમાં આવી જ ઘટનાઓ બની છે.

ન્યૂયોર્કમાં ભારતીય દૂતાવાસ તરફથી ટ્વિટર પર એક પોસ્ટમાં કહેવામાં આવ્યું છે કે, ન્યૂયોર્કના મેલવિલેમાં BAPS સ્વામિનારાયણ મંદિરમાં તોડફોડ અસ્વીકાર્ય છે. દૂતાવાસ સમુદાયના સંપર્કમાં છે અને આ ઘૃણાસ્પદ ઘટનાના ગુનેગારો સામે તાત્કાલિક પગલાં લેવા માટે યુએસ કાયદા અમલીકરણ અધિકારીઓ સાથે આ મામલો ઉઠાવ્યો છે.

વધુ વાંચો : 'પહેલા તમારા ઘરનું સંભાળો' ભારતે ઈરાનના સુપ્રીમ લીડરને મોં પર સંભળાવ્યું, શું વિવાદ?

BAPS સ્વામી નારાયણ સંસ્થા દ્વારા જાહેર કરવામાં આવેલા નિવેદનમાં કહેવામાં આવ્યું છે કે, અમે પ્રાર્થના કરીએ છીએ કે, જેમણે આ ગુનો કર્યો છે તેઓ તેમની નફરતમાંથી મુક્ત થાય અને સામાન્ય માનવતા જુએ. BAPS સ્વામી નારાયણ સંસ્થાએ જણાવ્યું હતું કે, આજે 16 સપ્ટેમ્બર, 2024ના રોજ આપણે દુ:ખી છીએ કે આપણે ફરી એકવાર નફરત અને અસહિષ્ણુતાના ચહેરા પર શાંતિ માટે અપીલ કરવી પડી છે. ગઈકાલે રાત્રે મેલવિલે ન્યુયોર્કમાં આવેલા BAPS શ્રી સ્વામિનારાયણ મંદિરને નફરતના સંદેશાઓ સાથે અપવિત્ર કરવામાં આવ્યું હતું. કમનસીબે આ એક અલગ ઘટના નથી. ઉત્તર અમેરિકામાં વિવિધ હિંદુ મંદિરોમાં અપવિત્રની સમાન ઘટનાઓ બની છે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ