બોલિવૂડના ઘણાં કલાકારોએ તેમની કળાના માધ્યમથી લોકોના દિલમાં રાજ કર્યું છે, પણ તેમાંથી કેટલાક કલાકાર એવા પણ છે જેઓ ટ્રેન્ડ સેટર સાબિત થયા છે. તેમાંથી જ એક છે બપ્પી લહેરી. બપ્પી દાએ ઘણો લાંબો સમય બોલિવૂડમાં કામ કર્યું છે. શરૂઆતમાં તેમની ગાયકી ઘણાં લોકોને પસંદ નહોતી આવી પરંતુ, જેમ-જેમ સમય પસાર થતો ગયો તેમના ગીતોએ ખલબલી મચાવી દીધી. બપ્પી દાના નામની સાથે 2 વસ્તુઓ હમેશાં જોડાયેલી છે. પહેલી તેમનું યૂનિક મ્યુઝિક અને બીજું બપ્પી દાનો ગોલ્ડ પ્રત્યેનો પ્રેમ. જેના વિશે બધાં જાણે છે. જેથી આજે તેમના જન્મદિવસ પર અમે જણાવી રહ્યાં છે કેમ બપ્પી દા આટલું સોનું પહેરે છે.
હોલીવુડના એલવિસ પ્રેસ્લીથી પ્રભાવિત થઈ સોનું પહેરવાનો આવ્યો વિચાર
બપ્પી દા માને છે કે સોનું તેમના માટે લકી છે
ગોલ્ડ પ્રત્યેના પ્રેમ માટે પણ ઘણાં પોપ્યુલર છે બપ્પી દા
21 વર્ષની ઉંમરે બોલિવૂડમાં ગીતો ગાવાનું શરૂ કર્યું
બપ્પી લહેરીનો જન્મ 27 નવેમ્બર 1952માં પશ્ચિમ બંગાળમાં થયો હતો. માત્ર 21 વર્ષની ઉંમરે બપ્પી દાએ બોલિવૂડમાં ગીતો ગાવાનું શરૂ કર્યું હતું. તેમણે તેમની કારકિર્દીની શરૂઆત વર્ષ 1973માં ફિલ્મ નન્હા શિકારીથી કરી હતી. બપ્પીને વર્ષ 1976માં પહેલી વખત વિશાલ આનંદની ફિલ્મ ચલતે ચલતેથી ઓળખ મળી. આ ફિલ્મ બોક્સ ઓફિસ પર ખાસ કમાલ દેખાડી શકી નહોતી પરંતુ ફિલ્મના ગીતોને ખૂબ પસંદ કરવામાં આવ્યા હતા.
મિથુન ચક્રવર્તીની ફિલ્મ ડિસ્કો ડાન્સરથી થયા સફળ
બપ્પી દા 1982માં આવેલી મિથુન ચક્રવર્તીની ફિલ્મ ડિસ્કો ડાન્સરથી કરિયરના ટોચે પહોંચી ગયા હતા. ફિલ્મના ગીતોએ ધમાલ મચાવી દીધી હતી. ત્યારબાદથી બપ્પી દા સફળતાના શિખરે પહોંચી ગયા હતા. તેમણે નમક હલાલ, શરાબી, હિંમતવાલા, સાહેબ, ગુરુ, ઘાયલ અને રંગબાઝ જેવી ફિલ્મોમાં સંગીત આપ્યું.વર્ષ 2000 બાદથી પણ તેઓ સક્રિય રહ્યાં છે. જોકે, આ સમય દરમિયાન તેમણે ઓછી ફિલ્મો માટે સંગીત આપ્યું હતું. તેમણે ટેક્સી નંબર 9211, ધ ડર્ટી પિક્ચર, હિંમતવાલા, બદ્રીનાથ કી દુલ્હનિયા અને વાય ચીટ ઈન્ડિયા જેવી ફિલ્મોમાં ગીતો આપ્યા છે.
ગોલ્ડ પ્રત્યેના પ્રેમ માટે પણ ઘણાં પોપ્યુલર છે બપ્પી દા
બપ્પી લહેરી તેમના ગોલ્ડ પ્રત્યેના પ્રેમ માટે પણ ઘણાં પોપ્યુલર છે. એક ઈન્ટરવ્યૂમાં તેમને પૂછવામાં આવ્યું હતું કે તેઓ આટલું સોનું કેમ પહેરે છે તો બપ્પી દાએ કહ્યું હતું કે, હોલીવુડમાં અમેરિકન રોક સ્ટાર એલવિસ પ્રેસ્લી સોનાની ચેન પહેરતા હતા. હું એલવિસને ખૂબ જ પસંદ કરતો હતો. ત્યારથી જ મે નક્કી કર્યુ હતું કે હું જીવનમાં સફળ થઈશ તો પોતાની એક અલગ જ ઇમેજ બનાવીશ. હું માનું છું કે ભગવાનની કૃપાથી હું આટલું સોનું પહેરી શક્યો અને સોનું મારા માટે લકી છે.
તેમની પત્ની પાસે છે વધુ સોનું
જોકે, તમને જાણીને આશ્ચર્ય થશે કે બપ્પી દા કરતાં પણ વધારે સોનું તેમની વાઈફ પાસે છે. બપ્પી દાના એફિડેવિટમાં આ વાત મેન્શન પણ કરવામાં આવી છે. જે મુજબ, તેમની પાસે કુલ 754 ગ્રામ સોનું છે, જ્યારે તેમની વાઈફ પાસે કુલ 967 ગ્રામ સોનું છે. બપ્પી દા પાસે માત્ર સોનું જ નહીં પણ ચાંદી પણ ખૂબ વધારે છે. બપ્પી દા પાસે 4.62 કિલો ચાંદી છે. જ્યારે તેમની પત્ની પાસે 8.9 કિલો ચાંદી છે.
બપ્પી દાને લોકેટ પહેરવું ખૂબ જ પસંદ છે
બપ્પી દાને મોટાભાગે લોકેટ પહેરવું ખૂબ જ પસંદ છે. તેમના ગળામાં ગણેજીનું લોકેટ હમેશાં જોવા મળે છે. આ સિવાય તે કેટલીક આકર્ષક ચેન અને બ્રેસ્લેટ પણ પહેરે છે.