સુરતમાં ભાજપના મેયર હેમાલી બોઘાવાલાના જ અડાજણ વોર્ડની હિમગિરી સોસાયટીમાં લાગેલા બેનરોમાં લખ્યું છે કે, અમે ભાજપને વોટ આપીને ભૂલ કરી છે
સુરત મેયરના વોર્ડમાં જ ભાજપવિરોધી બેનર
વિકાસના કામ ન થતા લોકોમાં રોષ
ભાજપને વોટ આપી ભૂલ કરી હોવાનો ઉલ્લેખ
સુરતમાં મેયરના વોર્ડમાં જ ભાજપવિરોધી બેનર લાગ્યા છે. લોકોના પ્રશ્નોનો નિકાલ ન થતા રોષ જોવા મળ્યો છે. અને મેયર હેમાલી બોઘાવાલાના વોર્ડમાં જ લોકોએ બેનર લગાવી વિરોધ કર્યો છે. અડાજણ વોર્ડની હિમગિરી સોસાયટીમાં લાગેલા બેનરોમાં લખ્યું છે કે, અમે ભાજપને વોટ આપીને ભૂલ કરી છે. બેનરમાં 25 વર્ષથી ભાજપને વોટ આપી ભૂલ કરી હોવાનો ઉલ્લેખ કરાયો છે. અને હવે વોટ માગવા ન આવતા હોવાનો પણ બેનરમાં ઉલ્લેખ છે. છેલ્લા 15 વર્ષથી રોડ રસ્તાના કામો ન થતા સ્થાનિકોમાં રોષ છે.
આ બેનર હિમગીરી સોસાયટીના રહીશો દ્વારા લગાવવામાં આવ્યું છે. જ્યારે તેમની સાથે આ બેનર વિશે વાત કરવામાં આવી તો તેમણે કહ્યું કે, ચોમાસા સહિત અનેક સમસ્યાઓ સાથે તેઓ વર્ષોથી જીવી રહ્યા છે. હજુ તો ચોમાસાની શરૂઆત થઈ રહી છે. પણ જ્યારે ચોમાસુ આવશે તો અહીં ચાલવાની પણ જગ્યા હશે નહીં. સ્થાનિકોએ કહ્યું કે, અહીંથી તેમને 900 વોટ મળે છે. અને છેલ્લા 25 વર્ષથી આ વોર્ડ ભાજપને સમર્પિત રહ્યો છે. અમે આંખ બંધ કરીને ભાજપને સમર્થન આપ્યું છે.
સ્થાનિક મહિલાઓએ લગાવ્યા આક્ષેપ
સ્થાનિક મહિલાઓએ કહ્યું કે, અમે બોર્ડ લગાવ્યું પછી ભાજપવાળા દોડતા થયા છે. પણ છેલ્લા 25 વર્ષથી અમારી કોઈ વાત સાંભળી નથી. તો સ્થાનિકોએ આક્ષેપ કર્યો કે, આ ઈમારતો છેલ્લા 40 વર્ષથી છે. અને જમીન માલિકોએ ખોટા દસ્તાવેજના આધારે જમીન બીજાને વેચી દીધી છે. જેથી કોઈ બિલ્ડરો અહીં આવતા નથી. અને આ સોસાયટી રિ-ડેવલોપમેન્ટમાં જતી નથી.