2020ના નવા વર્ષમાં અનેક નવી ટેકનોલોજી આવી રહી છે. બીજી બાજુ સાયબર એટેક પણ વધુ થાય તેવી આશંકા છે. 2020માં સાયબર ક્રાઇમ કરતા ગઠિયાઓની નજર મોબાઇલ બેન્કિંગ અને ઇ કોમર્સ પર રહેશે તેમ સાયબર સિક્યુરિટી સોફ્ટવેર બનાવતી અગ્રણી કંપનીએ જણાવ્યું છે. કંપનીનો દાવો છે કે નવા વર્ષમાં શેરબજારમાં રોકાણ માટેની એપ્લિકેશનો, ઓનલાઇન ફાઇનાન્સિયલ ડેટા પ્રોસેસિંગ સિસ્ટમ્સ તેમજ બિટકોઇન જેવી ક્રિપ્ટોકરન્સી પર સાયબર માફિયા અને હેકર્સની નજર રહેશે.
આ અહેવાલ બહાર પાડનારી કંપની કેસ્પર્સકીના જણાવ્યા મુજબ વર્ષ 2019-2020ના ચાલુ નાણાકીય વર્ષમાં સાયબર એટેકને સમજવામાં ઘણી મદદ મળી હતી. તેના આધારે આગામી દિવસોમાં તોળાઇ રહેલા ખતરાનો અંદાજ મળે છે. ફાઇનાન્સ ટેક કંપનીઓ સતત આ ખતરા સામે લડી રહી છે.
મુખ્ય સમસ્યા એ છે કે મોટાભાગની મોબાઇલ એપ્લિકેશનના ડેવલપર્સ સિકયુરિટી માટે યોગ્ય પગલા પણ લઇ રહ્યા નથી. આવી સ્થિતિમાં મોબાઇલ બેન્કિંગ એપ્લિકેશનનો કોડ લીક થવાને કારણે યુઝર્સના ડેટાનો ઉપયોગ ગુનામાં થઈ શકે છે અને તેમને આર્થિક નુકસાન થઈ શકે છે. હેકર્સ બેંકના નેટવર્ક સુધી પણ પહોંચી શકે છે અને ડેટા એકસેસ કરી શકે છે.
રિપોર્ટ અનુસાર કેટલાક ગ્રુપ આફ્રિકા, પૂર્વી યુરોપ અને એશિયાના કેટલાક દેશોમાં કામ કરશે, જે બેંકોના નેટવર્કને એક્સેસ કરીને ડેટા ગુનેગારોને વેચી શકે છે. આવા ગ્રુપ નાની ફાયનાન્સ કંપની,બેંક તેમજ મોટી કંપનીઓ દ્વારા ખરીદવામાં આવેલી નાની કંપનીઓને ટોર્ગેટ કરે તેવી શકયતા છે. ઓનલાઇન પેમેન્ટ,મેડિલ રેકોર્ડસ પણ તેમના નિશાના પર છે. ઓનલાઇન પેમેન્ટ પરના હુમલાના કારણે હજારો કંપનીઓને સંકટનો સામનો કરવો પડી શકે છે. આવી કંપનીઓએ હવે તેમની સિકયુરિટી વધુ સક્ષમ બનાવવી પડશે. અમેરિકા.યુરોપ સહિતના દેશોમાં વિવિધ હોસ્પિટલો તેમના દર્દીઓનો ડેટા ઓનલાઇન રાખે છે, તેથી આવા ડેટાની ચોરી પણ વધી શકે છે.