અપડેટ / LIVE બાંગ્લાદેશમાં તખ્તાપલટ બાદ શેખ હસીનાનું વિમાન હિંડન એરબેઝ પર ઉતર્યું, ભારતથી લંડન જવાની શક્યતા

બાંગ્લાદેશને જોડતી રેલ સેવા બંધ કર્યા બાદ હવે ઢાકાની હવાઈ સેવા પણ સ્થગિત કરી દેવામાં આવી છે. એર ઈન્ડિયાએ ઢાકામાં ફ્લાઈટ સેવાઓને સ્થગિત કરી દીધી છે. આ રીતે બાંગ્લાદેશ ભારતથી હવાઈ માર્ગે કપાઈ ગયું છે.

સૂત્રોના જણાવ્યા અનુસાર, શેખ હસીનાનું વિમાન હિંડન એર બેઝ પર લેન્ડ થયું. પ્લેન સાંજે 5:36 કલાકે હિંડન એરબેઝ પર લેન્ડ થયું હતું. વાયુસેનાના વરિષ્ઠ અધિકારીઓએ શેખ હસીનાનું સ્વાગત કર્યું હતુ. શેખ હસીનાને લઈ જઈ રહેલા C 130J એરક્રાફ્ટને હિંડનમાં ઉતરવાની પ્રાથમિકતા આપવામાં આવી હતી. સૂત્રો પાપ્ત એવી પણ વિગતો છે કે, ગમેત્યારે લંડન જઈ શકે છે

ભારતીય રેલ્વેના પ્રવક્તાના જણાવ્યા અનુસાર બાંગ્લાદેશમાં તાજેતરની હિંસક ઘટનાઓને ધ્યાનમાં રાખીને ભારતે બાંગ્લાદેશ સાથેની તમામ રેલ સેવાઓ સ્થગિત કરી દીધી છે. બાંગ્લાદેશ જતી કોલકાતા-ઢાકા-કોલકાતા મૈત્રી એક્સપ્રેસ ટ્રેન સહિત તમામ ટ્રેન સેવાઓ 19 જુલાઈથી 6 ઓગસ્ટ સુધી રદ કરવામાં આવી હતી.

રાજધાની દિલ્હીમાં બાંગ્લાદેશ હાઈ કમિશનની સુરક્ષા વધારી દેવામાં આવી છે. કાયદો અને વ્યવસ્થાની સ્થિતિ જાળવી રાખવા માટે ચાણક્યપુરી પોલીસ સ્ટેશનના 20થી વધુ કર્મચારીઓને બાંગ્લાદેશ હાઈ કમિશનના ગેટ પર તૈનાત કરવામાં આવ્યા છે. પોલીસે બેરીકેટ્સ લગાવી દીધા છે.

શેખ હસીનાને બાંગ્લાદેશી Mi17 હેલિકોપ્ટરથી ભારતીય સરહદેમાં લાવવામાં આવ્યા હતા. જે ટૂંક સમયમાં દિલ્હી પહોંચે તેવી શક્યતા છે. સુત્રો જણાવી રહ્યા છે કે તે લાંબા સમય સુધી ભારતમાં નહીં રહે તેઓ લંડન જશે તેવી શક્યતાઓ છે.

બાંગ્લાદેશમાં આ સમગ્ર વિવાદ 1971ની સ્વતંત્રતા ચળવળમાં ભાગ લેનારાઓના પરિવારો માટે સરકારી નોકરીઓમાં અનામત અને પ્રવેશ સામે વિરોધ સાથે શરૂ થયો હતો. આ હિંસામાં અત્યાર સુધીમાં 300થી વધુ લોકોના મોત થયા છે. શેખ હસીના સરકારે આંદોલનને કચડી નાખવા માટે સેના તૈનાત કરી હતી, જેનાથી વિવાદ વધુ વકર્યો હતો. હસીનાને ભારત તરફી માનવામાં આવે છે.

સૂત્રો પાપ્ત વિગતો મુજબ શેખ હસીનાએ બાંગ્લાદેશ દેશ છોડી દીધો છે. હિંસક વિરોધ વચ્ચે તેમણે રાજીનામું આપ્યું છે. સૂત્રોનું કહેવું છે કે તે દિલ્હી આવી શકે છે. ઢાકા ટ્રિબ્યુનના અહેવાલ મુજબ શેખ હસીના ભારત જવા રવાના થઈ ગયા છે.

આ સમગ્ર ઘટના અંગે સેનાએ પ્રેસ કોન્ફરન્સ પણ કરી હતી. સેનાએ કહ્યું કે હિંસાથી દેશને નુકસાન થયું છે. જો કે, સેના દેશની સ્થિતિને સંપૂર્ણ રીતે સંભાળશે. સેનાએ વચગાળાની સરકારની રચના સાથે દેશમાં શાંતિ સ્થાપવાની પણ વાત કરી હતી. આંદોલનકારીઓને કાયદો પોતાના હાથમાં ન લેવાની અપીલ પણ કરવામાં આવી હતી.