વર્લ્ડકપમાં ગઇકાલે મોટો ઉલટફેર જોવા મળ્યો. જેમાં બાંગ્લાદેશની ટીમે દક્ષિણ આફ્રિકાને 21 રને પરાજય આપ્યો છે. બાંગ્લાદેશ તરફથી શાકિબ અલ હસન 75 અને મુશ્ફિકર રહીમ 78 રનની અડધી સદીની મદદથી તેમજ બોલરોના શાનદાર પ્રદર્શનના કારણે વર્લ્ડકપની મેચમાં દક્ષિણ આફ્રિકાની ટીમને 21 રને હાર આપી પોતાના અભિયાનનો જીતથી પ્રારંભ કર્યો છે.
બાંગ્લાદેશ તરફથી આ સ્કોર વન ડેનો સર્વશ્રેષ્ઠ સ્કોર પણ હતો. ઉલ્લેખનીય છે કે વર્લ્ડકપ-2019માં દક્ષિણ આફ્રિકાની આ સતત બીજી હાર છે. આ અગાઉ ગુરૂવારના રોજ યજમાન ટીમ ઇંગ્લેન્ડ સામે 104 રને પરાજયનો સામનો કરવો પડયો હતો.
બાંગ્લાદેશ તરફથી શાકિબુલ અને મુશ્ફિકર વચ્ચે ત્રીજી વિકેટ માટે 142 રનની ભાગીદારી નોંધાઇ હતી. આ ભાગીદારીની મદદથી બાંગ્લાદેશે વન ડેનો સર્વશ્રેષ્ઠ સ્કોર 330 રન બનાવ્યાં હતા. 331 રનના લક્ષ્યાંકનો પીછો કરવા મેદાનમાં ઉતરેલી આફ્રિકાની ટીમ 50 ઓવરમાં 8 વિકેટના નુકસાન પર 309 રન જ બનાવી શકી હતી.
ઉલ્લેખનીય છે કે વન ડેમાં બાંગ્લાદેશનું આ અગાઉનું સર્વશ્રેષ્ઠ પ્રદર્શન પાકિસ્તાન સામે 2015માં 329 રન હતું. જ્યારે વર્લ્ડ કપમાં સર્વશ્રેષ્ઠ સ્કોર 2015માં સ્કોટલેન્ડ વિરુધ્ધ ચાર વિકેટે 322 રન હતો.
આફ્રિકા સામેની મેચમાં બાંગ્લાદેશ તરફથી મુસ્તાફિજુર રહમાને ત્રણ વિકેટ, સૈફુદ્દીને બે, જ્યારે મહેદી હસન, શાકિબે એક-એક વિકેટ ઝડપી હતી. શાકિબ અલ હસનને પોતાના શાનદાર પ્રદર્શનના કારણે મેન ઓફ ધ મેચ જાહેર કરાયો હતો.