ખોટી રીતે ફસાવી રૂપિયા પડાવ્યાના આરોપ સાથે યુવકે અગાઉ DSP, છાપી અને ડીસા પોલીસ મથકે અરજી કરી હતી, છેલ્લે ડીસા કોર્ટેનો દરવાજો ખખડાવ્યો
બનાસકાંઠામાં 10 પોલીસકર્મીઓ સામે તપાસના આદેશ
રેમડેસિવિર ઇન્જેક્શનની કાળાબજારીમાં ફસાવ્યાનો કર્યો હતો આક્ષેપ
યુવકે ડીસા કોર્ટમાં પોલીસ વિરૂદ્ધ કરી હતી અરજી
કોરોના કાળમાં પાસા એક્ટનો બેફામ ઉપયોગ મામલે ઘણી વખત ગુજરાત હાઈકોર્ટે સરકાર અને પોલીસ ખાતાને ટકોર કરી છે. એમાંય રેમડેસિવિર ઇન્જેક્શનની કાળાબજારી અને પોલીસે કરેલી પાસા એક્ટ પ્રમાણેની કાર્યવાહી સામે મોટા સવાલ ઊભા થયા છે. બનાસકાઠામાં પણ એક એવો કિસ્સો સામે આવ્યો હતો પણ અહી ખુદ આરોપીએ પોલીસ સામે આક્ષેપ કર્યા છે કે તેણે રેમડેસિવિર ઇન્જેક્શનની કાળાબજારીમાં ફસાવી પોલીસે ખોટી રીતે પૈસા પડાવ્યા છે. સમગ્ર મામલે ડીસા કોર્ટે 10 પોલીસકર્મીઓ સામે તપાસના આદેશ આપ્યા છે.
યુવકે ડીસા કોર્ટમાં પોલીસ વિરૂદ્ધ કરી હતી અરજી
એ કોરાનો કપરો કાળ કઈ રીતે ભૂલી શકાય જ્યારે સ્વજન દર્દીને બચવવા લોકો મોંઘાદાટ ઈન્જેક્શનો માટે કઈ પણ કરવા તૈયાર હતા. હોસ્પિટલની બહાર બે ત્રણ કિલોમીટર લાંબી લાઈનો લાગતી એ આશે કે આજે રેમડેસિવિર ઇન્જેક્શન મળશે અને તેમનો દર્દી સાજો થઈ જશે. પણ લોકોની મજબૂર સ્થિતિનો લાભ ઉઠાવવા કાળા બજારીઓ સક્રિય હતા, 500 થી 1000 રૂપિયામાં મળતું ઈંજેક્શન હજારોમાં બ્લેકમાં વેચાતું હતું. કેટલાક કટકીખોરો આમાં ખેલ કરી રહ્યા હતા. જેમાં બનાસકાઠામાં ખુદ પોલીસ સામે એક યુવકે આરોપ કર્યો છે કે રેમડેસિવિર ઇન્જેક્શનની કાળાબજારીમાં પોલીસ દ્વારા તેને ફસાવવામાં આવ્યો હતો. પોલીસે ખોટી રીતે કેસમાં ફસાવી પૈસા પડાવ્યા હોવાનો દાવો કરી ડીસા કોર્ટમાં અરજી કરી હતી. જે બાદ આજે કોર્ટે એક ઝાટકે 10 અધિકારીઓ સામે તપાસના આદેશ આપી દીધા છે.
પોલીસકર્મીઓ સામે તપાસના આદેશ થતા પોલીસ બેડામાં ખળભળાટ
પોલીસકર્મી સામે ડીસા કોર્ટમાં થયેલી સુનાવણીના અંતે મહત્વના આદેશ પારિત કરતાં હવે 10 પોલીસકર્મીઓ સામે તપાસ કરાશે. મહત્વનું છે કે યુવક અગાઉ DSP, છાપી અને ડીસા પોલીસ મથકે અરજી કરવામા આવી હતી પણ કોઈ પગલાં ન લેવાતા આખરે યુવકે ડીસા કોર્ટનો દરવાજો ખટખટાવ્યો હતો. જેમાં PI એમ.જે.ચૌધરી, PSI સુધીર રાણે, PSI આર.જી.દેસાઈ સહિત 10 સામે ગંભીર આરોપો કરવામાં આવ્યા છે. હવે તપાસ બાદ દૂધનું દૂધ અને પાણીનું પાણી થશે પણ જો યુવકના આક્ષેપમાં સચ્ચાઈ હોય તો પોલીસ કોરોના કાળમાં પોલીસે કરેલા સારા કામો પર કલંકિત ઘટના હશે.