અમીરગઢ / સમભાવ ટ્રસ્ટ દ્વારા આદિવાસી વિસ્તારની કુપોષિત સગર્ભા બહેનોને દત્તક લઇ કરાયું કીટ વિતરણ, આપી એમ્બ્યુલન્સની ભેટ

• કુપોષિત સગર્ભા મહિલાઓની વહારે સમભાવ ટ્રસ્ટ
• 100 જેટલી બહેનોને દત્તક લઈ કરાયું કીટ વિતરણ
• બનાસકાંઠાના વિરમપુર ખાતે કાર્યક્રમનું આયોજન

બનાસકાંઠા જિલ્લાના અમીરગઢ તાલુકાના આદિવાસી અંતરિયાળ વિસ્તારમાં 100 થી વધુ સગર્ભા બહેનો કુપોષણથી પીડાઈ રહી છે.ત્યારે અમદાવાદના સમભાવ ટ્રસ્ટ અને GTPL તેમજ પાલનપુર ચોકસી સુવર્ણકાર એસોશિએશન આ કુપોષિત બહેનોની વહારે આવ્યા છે. વિરમપુર ખાતે માં વાત્સલ્ય યોજના અંતર્ગત 100 જેટલી બહેનોને દત્તક લઇ તેમને કીટ વિતરણ કરવામાં આવ્યું હતું. 

સમભાવ ટ્રસ્ટ દ્વારા એમ્બ્યુલન્સની પણ ભેટ 
સમભાવ ટ્રસ્ટનાં કાજલબેન વડોદરિયા, સિદ્ધાર્થભાઈ વડોદરિયા અને GTPLના લાલભાઈ સહિતના દાતાઓ દ્વારા સગર્ભા બહેનોને દવાઓ, પ્રોટીન પાવડર, ન્યુટ્રિશિયન સહિતની રાશન કીટનું વિતરણ કરવામાં આવ્યું હતું. સાથે જ સમભાવ ટ્રસ્ટ દ્વારા એમ્બ્યુલન્સની ભેટ પણ આપવામાં આવી હતી.

ભગીરથ કાર્યને આદિજાતિ વિકાસ કમિશનરે બિરદાવ્યું
આપને જણાવી દઈએ કે, આ કાર્યક્રમ આદિજાતિ વિકાસ કમિશ્નર દિલીપકુમાર રાણાના અધ્યક્ષ સ્થાને યોજાયો હતો.આ દાતાઓના ભગીરથ કાર્યને આદિજાતિ વિકાસ કમિશ્નર દિલીપકુમાર રાણાએ બિરદાવ્યો હતો અને દાતાઓના સહયોગથી અંતરિયાળ વિસ્તારમાં રહેલા આદિવાસી વિસ્તાર કુપોષણમાંથી મુક્ત બનશે તેવી આશા વ્યક્ત કરી હતી.

100 જેટલી બહેનોને અપાશે આ ખાસ સુવિધાઑ
100 બહેનોને દત્તક લઇને નવ મહિના સુધી તેમનું બોડી ચેકઅપ ડોક્ટરો દ્વારા કરવામાં આવશે તેમની સલાહ મુજબ દર મહિને પૌષ્ટિક ખોરાક આપવામાં આવશે. આ બહેનોને પ્રસૂતિ બાદ પણ એક મહિના સુધી વધારે ખોરાક આપવામાં આવશે જેના કારણે આ જોખમી અને તેમના ગર્ભમાં ઊછરી રહેલા બાળકનું જીવન બનાવી શકાય અને કુપોષણમાંથી મુક્ત બનશે.