બનાસકાંઠા: પાલિકા દ્વારા 6 માસ પહેલા બનાવેલો રોડ તૂટ્યો

બનાસકાંઠા જિલ્લામાં નગરપાલિકાની પ્રિમોન્સૂનની પોલ ખુલી પડી છે. જયાં  પ્રથમ વરસાદમાં જ અનેક જગ્યાએ ઠેર ઠેર ભૂવા પડયા છે. 

મળતી માહિતી અનુસાર કલેકટર હાઉસથી નવા ગંજ સુધીનો રોડ પ્રથમ વરસાદમાં તૂટી ગયો છે અને અડધા કિલોમીટર સુધીના રોડમાં કેટલીક જગ્યાએ ભ્રષ્ટાચારના ભૂવા પડયા છે.

છતાં કુંભકર્ણની નિંદ્રામાં પોઢેલા અધિકારીઓ જાગતા નથી. જેનો ભોગ સ્થાનિક લોકોને બનવું પડે છે. રોડ તૂટી જતા લોકોએ આક્ષેપ કર્યો છે કે આ રોડ હલકી ગુણવતાનો બનાવ્યો હતો. 

ઉલ્લેખનીય છે કે રાજ્યના વડોદરા શહેરમાં પણ 12 અલગ અલગ જગ્યાએ રસ્તાઓ પર ભુવા પડ્યા હતા. ત્યારે વડોદરા મ્યુનિસિપલ કમિશ્નરે કોન્ટ્રાક્ટરો સામે લાલ આંખ કરી હતી. તેમજ નોટિસ ફટકારીને દંડ વસૂલાત કર્યો હતો. 

પ્રશ્ન એ છે કે હજુ જોઇએ એવી ચોમાસાની સિઝન ચાલુ થઇ નથી. ત્યારે આવા રસ્તો તૂટવા અને ભુવા પડવાની ફરીયાદો આવી રહી છે. ત્યારે આગળના ચોમાસામાં વરસાદ સમયે શહેરોના રસ્તાઓ કેવા હશે તે એક મોટો પ્રશ્ન છે. આવા રસ્તાઓ તૂટવાને લઇને તંત્રની બેદરકારી સામે આવી છે.