બનાસકાંઠામાં મેઘરાજાએ ધમાકેદાર બેટિંગ કરી છે. મુશળધાર વરસાદથી ડીસા તાલુકાના 10 જેટલા ગામના ખેતરોમાં પાણી ભરાયા છે. જેના કારણે ખેડૂતોને મોટુ નુકસાન થયું છે. ખેતરો બેટમાં ફેરવાય ગયા હોય તેવી સ્થિતિ સર્જાઇ છે. જેથી મગફળી, બાજરી, તલ સહિતના પાકો નિષ્ફળ ગયા છે. પાક નિષ્ફળ જતાં ખેડૂતોની હાલત કફોડી બની છે. રાજસ્થાનમાંથી આવતા પાણીના કારણે પાકને નુકસાન થયું છે.
ભારે વરસાદના પગલે બનાસકાંઠા જીલ્લા ઘણા બધા ખેડૂતોને મોટું નુકસાન થયું છે. ડીસા તાલુકા આસપાસના 10 જેટલા ગામના ખેતરોમાં પાણી ભરાઇ જતા ખેતરો બેટમાં ફેરવાઇ ગયા છે. ખેડૂતોએ સારા ઉત્પાદનની આશાએ કરેલા વાવેતરમાં પાણી ફરી વળ્યું છે.
બનાસકાંઠામાં છેલ્લા ચાર દિવસથી મેઘરાજા ધમાકેદાર બેટિંગ કરી હતી અને મુશળધાર વરસાદના પગલે અનેક વિસ્તારો બેટમાં ફેરવાઇ ગયા છે. સર્વત્ર જળબંબાકાર જેવી સ્થિતિ સર્જાતા અનેક ખેતરો બેટમાં ફેરવાઇ ગયા છે. તો ગામમાં પણ તળાવ જેવી સ્થિતિ સર્જાઈ છે. જ્યારે અનેક નીચાણવાળા ઘરોમાં પાણી ભરાઇ જતા લોકોના માલ ને ભારે નુકસાન થયું છે.
ડીસા તાલુકા આસપાસના ગામના ખેડૂતોની પણ આ જ પરિસ્થિતિ છે. અહીંના ખેડૂતોએ પોતાના ખેતરમાં આવેલ મગફળી ,બાજરી, તલ સહિતના પાકો નષ્ટ થઈ ગયા છે. પાક નુકસાનના કારણે આ વિસ્તારના ખેડૂતોની પરિસ્થિતિ કફોડી બની છે. અહીંના મોટા ભાગના ખેતરો પાણીના વહેણમાં આવેલા છે જેના કારણે દર વર્ષે અહીંના ખેતરોની આ જ હાલત થાય છે.
ડીસા તાલુકાઓના ગામડાઓના મોટાભાગના ખેતરોમાં 4 થી 5 ફૂટ જેટલું પાણી ભરાઈ ગયું છે. લોકોએ એક જગ્યાએથી બીજી જગ્યાએ જવા માટે પણ હોડી નો ઉપયોગ કરવો પડી રહ્યો છે. આ વિસ્તારના ખેડૂતોએ તો જાતે જ દેશી હોડી બનાવી દીધી છે.
ખેતરોમાં પાણી ભરાતા તે હોડીનો ઉપયોગ કરી તે એક ખેતર થી બીજા ખેતર મા અવરજવર કરી રહયા છે. વરસાદી પાણી ભરાઈ જતા ખેડુતોને ફુવારા તેમજ ખેતીના ઓજારો તણાઇ જાય છે ત્યારે તણાઈ ગયેલી વસ્તુઓને પાછી લાવવા માટે અને એક થી બીજા ખેતર પર અવરજવર માટે ખેડૂતો દેશી હોડી નો ઉપયોગ કરી રહ્યા છે.