બનાસકાંઠા / ડીસામાં પગ મૂકતાની સાથે જ જોવા મળે છે દોઢ ફૂટના ખાડા, સ્થાનિકો કંટાળ્યા પણ તંત્રને રસ્તા રિપેર કરવાની આળસ

• બનસકાંઠાના માર્ગો બન્યા બિસ્માર
• રસ્તામાં મસમોટા ખાડાથી લોકો પરેસાન
• લોકોને ક્યારે  મળશે સારા રસ્તા?

રાજ્યમાં ત્રાટકેલા ભારે વરસાદની થપાટે મોટાભાગના શહેરોના માર્ગો ભાંગીને ભુક્કો થયા છે. જેને લઇને વાહનચાલકોને સમસ્યા જન્મી છે. ત્યારે આ ઉપાધિમાંથી બનાસકાંઠા પણ બાકાત નથી. ડીસામાં કમ્મરતોડ ખાડાથી મહેમાનોનું સ્વાગત કરવામાં આવી રહ્યું છે. સ્થાનિકોએ આક્ષેપ કરતા જણાવ્યું કે, ખરાબ રસ્તાને લઇ અનેક વખત રજૂઆત કરવામાં આવી છે. છતાં તંત્રને આ ખાડાની મરામત કરવાની ફુરસદ નથી.

ઊંડા ખાડાથી વાહનચાલકો પર અકસ્માતનો ખતરો 
બનાસકાંઠાના  ડીસામાં પ્રવેશતાની સાથે જ રસ્તામાં મસમોટા ખાડાનું સામ્રાજ્ય જોવા મળી રહ્યું છે. રસ્તામાં એકથી દોઢ ફૂટના ખાડા હોવાથી વાહનકચાલકોના મણકા ખસી જાય તેવી સ્થિતિ જન્મી છે. ગુજરાતનો  સૌથી લાંબો એલિવેટેડ બ્રિજ બનાવવામાં આવ્યો છે. પરતું બ્રિજ નીચેનો સર્વિસ રોડ લોકોના હાડકાં ભાંગી  નાખે તેવો છે. ઊંડા ખાડાથી વાહનચાલકો પર અકસ્માતના ઝળુંબતા ખાતરા સાથે વાહનોમાં પણ મોટા પાયે નુકસાની થઇ રહી છે. 

વહેલી તકે રોડ પરના ખાડા બૂરાઇ તેવી લોકમાંગ 
નેશનલ હાઈવે પર ખાડાઓના કારણે વાહન ચાલકો ત્યાંથી પસાર થતા પહેલા સો વખત વિચારી રહ્યા છે અને અમુક વૃદ્ધો સહીતના લોકો તો ખાડાને કારણે મુસાફરી પણ માંડી વાળતા હોય તેવી સ્થિતિ પણ જન્મી છે.  વરસાદ બંધ થયો તેને ઘણો સમય વીતવા છતાં પણ તંત્ર દ્વારા આ ખાડાઓના સમારકામની દિશામાં કાર્યવાહી હાથ ધરવામાં આવી નથી. જેને લઇને તંત્રની આળસુ વૃતિ સામે લોકોમાં રોષ ભભૂકી રહ્યો છે. તંત્ર દ્વારા વહેલી તકે આ કાર્યવાહી હાથ ધરવામાં આવે તેવી લોકો માંગ ઉઠાવી રહ્યા છે. 

સળગતા સવાલ

• બનાસકાંઠાના લોકોને સારા રસ્તા ક્યારે મળશે?
• શું લોકોને સારા રસ્તાની જરૂર ન પડે?
• જનપ્રતિનિધિઓને આ રસ્તો દેખાતો કેમ નથી?
• શું માત્ર વોટ લેવા સમયે જ લોકોની વચ્ચે જવાનું?
• શું આ રસ્તો વાહન ચલાવવા લાયક છે?
• આ રસ્તા પર અકસ્માત થશે, તે જવાબદાર કોણ?