ડીસાની અર્બુદા વિદ્યાલયના બાળકો દ્વારા પ્રકૃતિના સંરક્ષણ માટે 2000 થી પણ વધુ પક્ષીઘર બનાવી અલગ અલગ ગલીઓમાં અને ઝાડ પર બાંધ્યા લટકાવ્યા હતા
બનાસકાંઠામાં પ્રકૃતિના સંરક્ષણ માટે નાનકડી જહેમત
લુપ્ત થઈ રહેલી પ્રજાતિને બચાવવાની ઝુંબેશ
વિદ્યાર્થીઓએ બનાવ્યા 2000 પક્ષીઘર
ગામડાઓની શહેરો તરફની દોડ અને શહેરોમાં ઊભા થઈ રહેલા સિમેન્ટ કોંક્રિટના જંગલો, આ બધી જ પરિસ્થિતિ વચ્ચે પક્ષીઓના છીનવાતા રહેઠાણો અને તેમને અનુકૂળ વાતાવરણ ચિંતાનો વિષય બન્યા છે. ત્યારે લુપ્ત થવા તરફ જઈ રહેલા પક્ષીઓનો કલરવ ફરી શહેરોમાં સંભળાય તે માટે ડીસાની અર્બુદા વિદ્યાલયના બાળકો દ્વારા અનોખી ઝુંબેશ શરૂ કરાઈ છે.
વેસ્ટ ચીજ વસ્તુઓનો ઉપયોગ કરીને ચકલી ઘરનું નિર્માણ
પ્રકૃતિના સંરક્ષણ માટે ડીસાની અર્બુદા વિદ્યાલયના બાળકોએ નાનકડી જહેતમ ઉઠાવી છે. બનાસકાંઠાના ડીસાની અર્બુદા વિદ્યાલયના બાળકોએ લુપ્ત થઈ રહેલી ચકલીને આ ધરતી પર નવેસરથી વસાવવા બાળકોએ કાગળના પૂંઠા, સેલોટેપ, કલર, ઝાડના પાંદડાઓ રંગબેરંગી પટ્ટીઓ સહિતની વેસ્ટ ચીજ વસ્તુઓનો ઉપયોગ કરીને ચકલી ઘર બનાવ્યા હતા.વિદ્યાર્થિનીઓએ વહેલી સવારે 8:00 વાગ્યાથી બપોરના બે વાગ્યા સુધીમાં અંદાજે 2000 થી પણ વધુ પક્ષીઘર બનાવ્યા હતા અને ત્યારબાદ તેને શહેરની અલગ અલગ ગલીઓમાં અને ઝાડ પર બાંધ્યા લટકાવ્યા હતા. શહેરના નાગરિકોને પક્ષીઓ બચાવાનો અને તેમના સંરક્ષણનો સંદેશ આપ્યો હતો.
વિલુપ્ત થતાં પક્ષીઓને બચાવવા જહેમત
એક સમય હતો જ્યારે વહેલી સવારે ઉઠીએ ત્યારે પક્ષીઓનો સુંદર મજાનો કલરવ માણસોના કાનમાં ગૂંજતો હતો. પરંતુ હવે તેનું સ્થાન મોબાઇલની રીંગટોને લઈ લીધું છે. કારણ કે શહેરીકરણના કારણે વૃક્ષો નાશ થઈ રહ્યા છે અને પક્ષીઓ વિલુપ્ત થઈ રહ્યા છે. ત્યારે ચકલી જેવાં પક્ષીઓ ફરી મનુષ્ય જાત પર વિશ્વાસ કેળવે અને શહેરોમાં ફરીવાર કિલ્લોલ કરતા જોવા મળે તે માટે આ શાળા પક્ષીઘર બનાવવાની એક ઝુંબેશ શરૂ કરવામાં આવી છે. વિલુપ્ત થતાં પક્ષીઓને બચાવવા તેમના રહેઠાણ, ખોરાક અને પાણીની વ્યવસ્થા કરવી જરૂરી બની છે.