રાજ્યના જુદા-જુદા શહેરોમાં રખડતાં ઢોરના વધતાં જતાં ત્રાસ વચ્ચે આજે બનાસકાંઠાના મેરવાડા નજીક આખલો આડે ઉતરતા અકસ્માતમાં થયો હતો જેમાં એક મહિલાનું મોત નીપજ્યું હતું.
મોરબીમાં સરકારી કચેરીઓમાં આખલાઓનો અડિંગો
આખલો આડે ઉતરતા બનાસકાંઠામાં અકસ્માત
જૂનાગઢમાં રસ્તા વચ્ચે આખલાયુદ્ધ
રાજ્યભરમાં અનેક શહેરોમાં રખડતા ઢોરનો આતંક યથાવત્ છે. મોરબીમાં સરકારી કચેરીઓમાં આખલાઓએ અડિંગો જમાવ્યો છે. જેને લઈ સરકારી કચેરીમાં અરજદારોને ભારે હાલાકીનો સામનો કરવો પડી રહ્યો છે. જેને પગલે સરકારી કચેરીમાં સિક્યોરિટી ગાર્ડ રાખવા સ્થાનિકોએ માંગ ઉઠાવી છે. તો જૂનાગઢમાં પણ રખડતા ઢોરનો આતંક યથાવત્ જોવા મળ્યો છે.તો બનાસકાંઠાના મેરવાડા ગામ પાસે કારમાં સવાર પરિવારને અચાનક રોડ વચ્ચે આખલો આવી જતા અકસ્મતા થયો હતો. જેમાં કારમાં સવાર મહિલાનું મૃત્યુ થયું હતું ચાલકને ગંભીર ઈજા પહોંચી હતી. કારમાં બેઠેલા 4 વર્ષીય બાળકનો આબાદ બચાવ થયો છે ત્યારે રખડતા પશુને કારણે એક અઠવાડિયામાં બીજું મૃત્યુ થતા લોકમાં ભારે રોષની લાગણી ફેલાઈ છે. જેથી લોકોને આ સમસ્યામાંથી ઉગારવા માંગ ઉઠી છે.
મોરબી સરકારી કચેરીમાં આખલારાજ
રાજ્યમાં અન્ય શહેરોની માફક મોરબીમાં રખડતા આખલાનો આતંક યથાવત્ છે. સરકારી કચેરીઑમાં આખલાનો અડિંગો જોવા મળતા લોકોમાં રોષ ફેલાયો છે. વધુમાં તાલુકા સેવા સદનમાં આખલાઓનું રાજ હોવાથી સરકારી કચેરીમાં આખલો આવતા અરજદારોમાં નાશભાગ મચી જવા પામી હતી. રજાના દિવસોમાં તાલુકા સેવા સદનમાં આખલાએ કબ્જો જમાવ્યો હોવાથી સરકારી કચેરીમાં સિક્યોરિટી ગાર્ડ રાખવા સ્થાનિકોમાં માંગ ઉઠી છે.
બનાસકાંઠામાં રખડતા ઢોરે લીધો જીવ
તો બનાસકાંઠામાં રખડતા ઢોરને લઇને મેરવાડા ગામ પાસે અકસ્માતની ઘટના સામે આવી હતી. અચાનક રોડ વચ્ચે આખલો આવી જતા કારમાં જઇ રહેલા પરિવારને અકસ્માત નડ્યો હતો. જેમાં ગાડી પલ્ટી જતાં અકસ્માત સર્જાયો હતો. જેને લઇને કારમાં સવાર મહિલાનું મૃત્યુ નીપજ્યું હતું જ્યારે ચાલકને ગંભીર ઈજા પહોંચી હતી. વધુમાં કારમાં બેઠેલા 4 વર્ષીય બાળકનો આબાદ બચાવ થયો હતો. નોંધનીય છે કે રખડતા પશુને કારણે એક અઠવાડિયામાં બીજું મૃત્યુ નિપજતા લોકોમાં રોષ ફેલાયો છે.
જૂનાગઢમાં રસ્તાની વચોવચ્ચ બે આખલાઓ બાખડ્યા
બીજી તરફ જૂનાગઢ પણ રખડતા ઢોરના આતંકમાંથી બાકાત નથી. જૂનાગઢમાં રસ્તાની વચ્ચે બે બેફામ બનેલા આખલાઑ વચ્ચે યુદ્ધ ખેલાયું હતું. જૂનાગઢમાં જાહેર રસ્તાની વચ્ચે બે આખલાનું યુદ્ધ થયા બાદ ગેસ્ટ હાઉસમાં આખલા ઘુસી ગયા હતા. ત્યારબાદ આખલાઑ ત્રાટકતા ટેબલ ખુરસીનો કડૂસલો બોલી ગયો હતો. મહત્વનું છે કે રખડતા ઢોરથી શહેરીજનો પરેશાન છે ત્યારે તંત્રની ઢોર પકડવાની કામગીરી નિષ્ફળ ગઇ હોવાનું સાબિત થઇ રહ્યું છે.