બનાસકાંઠાઃ તમે ઘણી બધી વાર લોકોની ગાડીની ચોરી થઇ હોવાંની ઘટનાઓ સામે આવે છે. ત્યારે હવે પોલીસની કારની પણ ચોરી થઇ હોવાંની ઘટના સામે આવી છે. બનાસકાંઠામાં અમીરગઢ પોલીસની કાર લઈને એક બુટલેગર ફરાર થયો હોવાંની ઘટના સામે આવી છે.
મળતી માહિતી મુજબ અમીરગઢ પોલીસે રાજસ્થાનમાંથી આવતી ગાડીમાંથી દારૂને જથ્થો ઝડપી પાડ્યો હતો. આ દરમ્યાન બુટલેગર પોલીસકર્મીઓની આંખમાં સ્પ્રે નાખીને તે ફરાર થઇ ગયો હતો. બુટલેગર પોતાની દારૂ ભરેલી ગાડી મૂકીને પોલીસની ગાડી લઈને તે ઘટનાસ્થળેથી ફરાર થઇ ગયો હતો. આ મામલે અજાણ્યાં શખ્સ સામે લૂંટની ફરિયાદ પણ થઈ છે.
મહત્વનું છે કે ગુરૂવારની રાત્રે પોલીસને એવી બાતમી મળી હતી કે હાઇ-વે વિસ્તારમાં કોઈ પોતાની કારમાં દારૂ લઈને ઉભા છે. તે દરમ્યાન અમીરગઢ પોલીસ જવાન અન્ય સ્ટાફનાં માણસોને સાથે લઇને પોતાની કારને લઈ તેઓ ઘટનાસ્થળે ગયા હતાં અને ત્યાં ઉભેલી કારની તપાસ કરી રહ્યાં હતાં.
તે દરમ્યાન બુટલેગર સહિત કેટલાંક લોકોએ પોલીસકર્મીઓની આંખમાં સ્પ્રે નાખીને તેઓ પોલીસની માલિકીની કાર લઈને ત્યાંથી ફરાર થઈ ગયા હતાં. જો કે હવે પોલીસે ગુનો નોંધીને આ મામલે વધુ તપાસ હાથ ધરી છે.