બનાસકાંઠા: થરાદ ચેકપોસ્ટ પાસે બસમાંથી વિદેશી દારૂ ઝડપાયો પોલીસે કરી કાર્યવાહી

બનાસકાંઠાના થરાદના ખોડા ચેકપોસ્ટ પરથી લક્ઝરી બસમાંથી વિદેશી દારૂનો જથ્થો ઝડપાયો છે. પોલીસે બાતમીના આધારે લકઝરી બસમાં 3 બેગમાંથી વિદેશી દારૂની 108 બોટલો ઝડપી પાડી છે. વિદેશી દારૂ સાથે પોલીસે એક શખ્સની પણ ધરપકડ કરી છે. પોલીસે 10 લાખનો મુદ્દામાલ કબ્જે કરીને આગળની કાર્યવાહી હાથધરી છે.

આ મામલે મળતી જાણકારી અનુસાર થરાદના ખોડા ચેકપોસ્ટ પરથી એક લક્ઝરી બસમાં વિદેશી દારૂ હોવાની બાતમી સ્થાનિક પોલીસને મળતા છટકું ગોઠવવામાં આવ્યું હતું. જ્યારે આ લક્ઝરી ચેકપોસ્ટ પાસે આવી ત્યારે તપાસ માટે તેને અટકાવવામાં આવી અને તપાસ કરતા તેમાં રહેલ 3 બેગમાંથી વિદેશી દારૂની 108 બોટલો મળી હતી. આ સાથે જ એક શખ્સની પણ પોલીસે ધરપકડ કરી હતી.

પોલીસે ઝડપી પાડેલ દારૂ આશરે 10 લાખની કિંમતનો હોવાનું પ્રાથમિક તપાસમાં જાણવા મળ્યું હતું. આ મામલે પોલીસે શખ્સને ઝડપીને પૂછપરછ હાથ ધરી હતી. જો કે આ દારૂ કોના કહેવાથી ગુજરાતમાં લાવવામાં આવી રહ્યો હતો અને કોને પહોંચાડવાનો હતો તે અંગે હજી સુધી કોઇ જાણકારી પ્રાપ્ત થઇ શકી નથી.

આપને જણાવી દઇએ કે એક તરફ ગાંધીના ગુજરાતમાં દારૂબંધી હોવાછતાં વારંવાર દારૂ ઝડપાવાના બનાવો સામે આવી રહ્યા છે ત્યારે આ મામલે તંત્ર પણ વધુ સક્રિય બનીને આવી ગેરકાનુની હરકત કરતા લોકો સામે લાલઆંખ કરે તેવી લોકમાગ ઉઠવા પામેલ છે.