અમૂલ બાદ બનાસ ડેરીએ પણ પશુપાલકો માટે મોટો નિર્ણય લઈ પ્રતિ કિલો ફેટના દૂધના ખરીદ ભાવમાં 20 રૂપિયાનો વધારો કર્યો છે.
બનાસડેરીનો મહત્વનો નિર્ણય
પશુપાલકોના દૂધના ભાવ વધારાયા
પ્રતિકિલો ફેટે રૂ.20 વધ્યા
બનાસડેરી તરફથી પશુપાલકો અને ખેડૂતોને મોટી ભેટ આપવામાં આવી છે. બનાસડેરીએ પશુપાલકોને દુધના ભાવમાં પ્રતિ કિલોના ફેટ પર રૂપિયા 20નો વધારો આપવાની જાહેરાત કરી છે. બનાસડેરીના આ નિર્ણયથી બનાસકાંઠા જિલ્નાના સાડા ચાર લાખ પશુપાલકોને સીધો લાભ પહોંચશે. આ ભાવ વધારાની જાહેરાતથી ખેડૂતોમાં આનંદની લાગણી જોવા મળી રહી છે.પશુપાલકોને પ્રતિકિલો ફેટે રૂ.715ને સ્થાને રૂ.735 રૂપિયા મળશે.
બનાસ ડેરીના ચેરમેન શંકર ચૌધરીએ શું કહ્યું?
હાલના સમયમાં પશુપાલકોને પશુ નિભાવ ખર્ચ ખૂબ મોટા પ્રમાણમાં લાગી રહ્યો છે. જેથી પશુપાલકોને રાહત થાય તે માટે બનાસ ડેરીએ દૂધના ભાવમાં પ્રતિકિલો ફેટે રૂ.20 વધાર્યા છે.1 મેના રોજ બનાસ ડેરી દ્વારા પ્રતિકિલો ફેંટે રૂ.10નો કર્યો વધારો હતો તે અગાઉ ફેબ્રુઆરીની શરૂઆતમાં દૂધના ખરીદભાવમાં 25 રૂપિયાનો વધારો કર્યો હતો. અને આવતીકાલ સોમવારથી બીજા 20 રૂપિયાનો દૂધના ખરીદભાવમાં પ્રતિકિલો ફેટે વધારો કર્યો છે. આમ છેલ્લા 3 મહિનામાં બનાસ ડેરી દ્વારા 50થી પણ વધુ રૂપિયાનો વધારો કરી પશુપાલકો મોટી રાહત આપવાનો નિર્ણય કર્યો હોવાનું બનાસ ડેરીના ચેરમેન શંકર ચૌધરીએ જણાવ્યું હતું. સાથે એ પણ સ્પષ્ટતા કરી હતી કે આ ભાવ વધારાની અસર બનાસ ડેરીનું દૂધ વપરાશ કરતાં ગ્રાહકો પર નહીં પડે.
શનિવારે અમૂલ ડેરીએ દૂધ ખરીદ ભાવ વધાર્યા
અમૂલ ડેરીએ દૂધના ખરીદ ભાવમાં 10 રૂપિયાનો વધારો કર્યો છે. અગાઉ ભેંસના દૂધના ભાવ પ્રતિ કિલો 730 રૂપિયા મળતો હતો જે હવે 740 કરવામાં આવ્યો છે. તો ગાયના દૂધના પ્રિત કિલો ફેટના ભાવ 331.80 રૂપિયા મળતા હતા જે હવે 336.40 રૂપિયા મળશે. જેના કારણે પશુપાલક સાથે જોડાયેલા આણંદ, ખેડા અને મહિસાગર જિલ્લાના 6 લાખથી વધુ પશુપાલકોને આ ભાવ વધારાથી લાભ થશે.