વાઘોડિયાના ધારાસભ્ય મધુ શ્રીવાસ્તવે ફરી વાર હુંકાર કર્યો છે અને લોક સભાની વડોદરા બેઠક પરથી ચૂંટણી લાડવા માટે ટિકિટની માંગણી કરી છે. વિધાનસભામાં પણ બાહુબલી તરીકે ઓળખાતા મધુ શ્રીવાસ્તવે પાર્ટી પાસે ટિકિટની માંગણી કરીને રાષ્ટ્રીય રાજકારણમાં પ્રવેશવા માટે ખુલ્લી લડત શરૂ કરી છે. જોઈએ આ અહેવાલ.
લોકસભાની ચૂંટણી નજીક આવી રહી છે ત્યારે નેતાઓ ખાનગીમાં પોતાનું લોબિંગ કરવાનું શરૂં કરી દે છે અને રાજકીય ગોડ ફાધરોના શરણે જતા હોય છે. બસ આવી જ રીતે વડોદરાના વાઘોડિયામાં છેલ્લી છ ટર્મથી ધારાસભ્ય તરીકે ચૂંટાઈ આવતા મધુ શ્રીવાસ્તવે હવે કેદ્રીય રાજકારણમાં પ્રવેશ કરવા માટે પાર્ટી પાસે ટિકિટ માંગી છે.
આ માટે તર્ક આપી રહેલા મધુશ્રીવાસ્તવને લાગે છે કે પોતે બાહુબલી ધારાસભ્ય છે અને આગામી લોકસભામાં પણ નરેદ્ર મોદીને બાહુબલી સાંસદોની જરૂર પડવાની છે એટલું જ નહી મધુશ્રીવાસ્વને હવે ગુજરાતીઓ સાથે સાથે સમગ્ર ઉત્તરભારતીયોની પણ સેવા કરવાની સેવાભાવના જાગી છે. આથી તેઓ લોકસભા ચૂંટણી લડવા ટિકિટના દાવેદાર હોવાનું જણાવની રહ્યા છે.
મધુ શ્રીવાસ્તવ ટિકિટ માટે પોતાના દાવાના સમર્થનમાં પોતાની બાહુબલિ તરીકેની ઈમેજ અને પોતાની કારકિર્દીને ગણાવી રહ્યા છે. તેઓ છ ટર્મથી વાઘોડિયાના ધારાસભ્ય છે. તેઓ બે ટર્મ વડોદરા કોર્પોરેશનના કોર્પોરેટર રહી ચૂક્યા છે. મધુ શ્રીવાસ્તવ એક ટર્મ બરોડા ડેરીના ચેરમેન પણ રહી ચૂક્યા છે. ત્યારે હવે ગુજરાતમાં રહેતા એક કરોડ ઉત્તરભારતીયો અને દેશના અન્ય નાગરિકોની સેવા કરવાનો મોકો મળે તે માટે લોકસભાની ટિકિટની માંગ કરી રહ્યા છે પરંતુ તેમનો ટિકિટ માંગવાનો જે અંદાજ કેમેરામાં કેદ થયો છે તે રોચક છે. આત્મવિશ્વાસથી ભરેલો પણ છે અને થોડો વિવાદ જગાવે તેવો પણ છે.
જો કે વડોદરાનું હાલનું રાજકારણ જોતાં મધુ શ્રી વાસ્તવને લોકસભા ટિકિટ મળશે કે કેમ તે એક સવાલ છે કેમ કે વડોદરા બેઠક પરના ઉમેદવાર રંજનબેન ભટ્ટ ભાર્ગવ ભટ્ટ ભરત ડાંગર અને શબ્દશરણ બ્રહ્મભટ્ટ જેવા નેતાઓ પણ લોકસભા ટિકિટ માટે લાઈન માં છે. એટલું જ નહીં થોડા સમય પહેલા મધુ શ્રીવાસ્તવ પોતે ધારાસભ્ય હોવા છતાં પોતાના મતવિસ્તારમાં સ્થાનિક વિકાસ કામ ન થતાં હોવા માટે ગાંધીનગર પર દોષનો ટોપલો ઢોળ્યો હતો અને કેટલાક મંત્રીઓ અને અધિકારીઓને પણ આ માટે જવાબદાર ઠેરવ્યા હતા. જેના કારણે ગુજરાત ભાજપ હાઈકમાન્ડની નારાજગીનું કારણ પણ બન્યા હતા. ત્યારે હવે તેઓ પોતાને લોકસભા ટિકિટના દાવેદાર ગણાવી રહ્યા છે તે કેટલું સફળ નીવડે છે તે તો ટિકિટ વહેંચણીમાં ખબર પડી જશે.