ઈંતેજાર / 10 વર્ષ થઈ ગયાં છતાં ગુજરાતના આ હાઈ-વેની કામગીરી પૂર્ણ નથી થઈ

આ વાત છે બગોદરા, તારાપુરથી વાસદના હાઇવેની. દસ વર્ષ પહેલા રોડનું ખાતમૂર્હત કરવામાં આવ્યુ હતુ પરંતુ કામગીરી હજુ પણ અધુરી છે. નેશનલ હાઇવે 8 પર સીક્સલેનનો હાઇવે બનાવવા માટે નીતીન ગડકરીની કંપની જીવીકેને ટેન્ડર આપવામાં આવ્યો. પ્રોજેક્ટની રૂપરેખા કાગળ પર પરિપુર્ણ થઇ. અને ત્યારબાદ બગોદરાથી વટામણ તારાપુર થઇને વાસદ સુધીનો 101.90 કિમીનો સીક્સ લેનનો રોડ તૈયાર કરવાની કામગીરી શરૃ થઇ. દસ વર્ષ જેટલો સમય થઇ ગયો પરંતુ માંડ 25 ટકા જેટલી જ કામગીરી પુર્ણ થઇ છે.

ટ્રાફિકનું ભારણ ઓછુ કરવા માટે દક્ષિણ ગુજરાત અને સૌરાષ્ટ્રને જોડતા આ હાઇવે બનાવવા માટે 870 કરોડ રૂપિયા મંજૂર કર્યા હતા. ટેન્ડર પ્રમાણે હાઇવેનું કામ ત્રણ વર્ષમાં પુરૂ કરવાનુ હતુ. પરંતુ દાયકા પછી 300 કરોડના ખર્ચે માત્ર 25 ટકા જ કામગીરી થઇ છે. નવાઇની વાત એ છે કે અગાઉના કોન્ટ્રાકટરનો કોન્ટ્રાક્ટ રદ કરીને નવેસરથી 1650 કરોડનું નવું ટેન્ડર બહાર પાડ્યુ. હાઇવે વહેલી તકે પુર્ણ કરવા બે કોન્ટ્રાક્ટરને કામ સોપવામાં આવ્યુ. જેના કારણે સરકારની તીજોરી પર ભારણ વધી ગયું. 

પહેલા 870 કરોડમાં જે સીક્સલેન તૈયાર થવાનો હતો તે 1650 કરોડમાં બનશે. પ્રશ્ન તો એ પણ થાય કે જ્યારે પહેલાના કોન્ટ્રાક્ટરે 300 કરોડના ખર્ચે 25 ટકા કામ પુર્ણ કર્યુ હતુ તો પછી તેને ટાઇમલાઇન અપીને તેની પાસે કામ કેમ ના કરાવ્યુ. આવા તો ઘણા સવાલો ઉભા થઇ રહ્યા છે જેના કોઇ પ્રત્યુતર નથી.

આ તો વાત સરકારના ખર્ચાની થઇ પરંતુ ત્યાંથી પસાર થતા રાહદારીઓ અને ગ્રામજનોને રોડના 12 ડાઇવર્ઝન પસાર કરવા પડે છે જેમાં અકસ્માત અને જોખમ રહેલુ છે. હાઇવે સીક્યુરીટીના સોર્સ પ્રમાણે 100થી પણ વધુ મૃત્યુ આ ડાઇવર્ઝનને કારણે થયેલા છે. હવે આ હવાઇ હાઇવે ક્યારે બને તે જોવુ રહ્યું.