દિલ્હી / બેડમિન્ટન સ્ટાર સાયના નેહવાલની રાજકારણમાં એન્ટ્રી, ભાજપનો કેસરીયો ધારણ કર્યો

• પાર્ટીના મહાસચિવ સહિતના નેતાઓની હાજરીમાં સાયના ભાજપમાં સામેલ 
• સાઈનાની સાથે તેમની બહેને પણ ભગવો ખેસ ધારણ કર્યો 
• પાર્ટીમાં સામેલ થયા બાદ દિલ્હી વિધાનસભા ચૂંટણીમાં સાયના ભાજપને કરાવી શકે છે ફાયદો 

દિલ્હીમાં અત્યારે ચૂંટણી પ્રચાર ચરમસીમાએ 

બેડમિન્ટન ખેલાડી સાયના નેહવાલ ભાજપમાં સામેલ થઇ ગઈ છે. તે દિલ્હી વિધાનસભા ચૂંટણીમાં ભાજપ માટે ચૂંટણી પ્રચાર કરશે. ભાજપ નેતાઓની હાજરીમાં સાયના નેહવાલે ભગવો ખેસ ધારણ કર્યો છે. સાયનાના ભાજપમાં સામેલ થવાથી ભાજપને દિલ્હીમાં ફાયદો થઇ શકે છે. દિલ્હીમાં અત્યારે ચૂંટણીમાં બધી પાર્ટીએ પોતાનું જોર લગાવી રહી છે. બધા જ નેતાઓ ધુઆંધાર પ્રચાર કરી રહ્યા છે. ભાજપ માટે સાયના સ્ટાર ચહેરો બનશે. 

ભાજપમાં સામેલ થયા બાદ સાયનાએ ભાજપ અને વડાપ્રધાનના કર્યા વખાણ 

ભાજપમાં સામેલ થતા જ સાયનાએ કહ્યું કે ''આજે ખુબ શુભ દિવસ છે. મેં ઘણા મેડલ જીત્યા છે પણ આજે હું તે પાર્ટીમાં સામેલ થઇ રહી છું જે દેશ માટે કામ કરે છે. હું મહેનતુ ખેલાડી છું એટલે મને મહેનતુ લોકો સાથે જ કામ કરવું મને ગમે છે.'' સાયનાએ આગળ કહ્યું કે પીએમ નરેન્દ્ર મોદીથી મને ખુબ પ્રેરણા મળે છે. નરેન્દ્ર સરે દેશ માટે બહુ જ કામ કર્યા છે. મને આનંદ છે કે હું આ પાર્ટીમાં સામેલ થઇ છું જે દેશ માટે કામ કરે છે અને મને આશા છે કે હું પાર્ટીની અપેક્ષાઓ પ્રમાણે કામ કરી શકીશ. 

#WATCH Badminton Player Saina Nehwal on joining BJP: The way Prime Minister works day & night, I like it very much. I like doing something for the country & BJP is a party that is doing good work for the country, I am happy to have joined the party. pic.twitter.com/q8oHcemoLh

— ANI (@ANI) January 29, 2020

8 ફેબ્રુઆરીએ દિલ્હીમાં થશે મતદાન 

નોંધનીય છે કે દિલ્હી વિધાનસભાની 70 બેઠકો માટે 8 ફેબ્રુઆરીએ મતદાન થવાનું છે. 11મી ફેબ્રુઆરીએ તેનું પરિણામ આવશે. દિલ્હીમાં જગ્યાએ-જગ્યાએ રોડ શો થઇ રહ્યા છે. આમ આદમી પાર્ટી મફતમાં આપેલી વસ્તુઓ પર વોટ માંગી રહી છે. બીજી તરફ ભાજપ અનઅધિકૃત કૉલોનીને અધિકૃત કરવાના કામ પર વોટ માંગી રહી છે. આ સિવાય નવો નાગરિકતા કાયદા જેવા મુદ્દા પણ ચૂંટણીમાં મોટો વિષય બની રહ્યા છે.