ભાવ વધારો / પેટ્રોલ-ડીઝલ બાદ હવે ગુજરાતમાં CNGએ આપ્યો ઝટકો, ભાવવધારો જાણીને ધ્રાસકો લાગશે

• CNG વાહનચાલકો માટે માઠા સમાચાર
• અદાણી ગેસમાં 2 રૂપિયાનો ભાવ વધારો 
• CNG વાહનચાલકોના ખિસ્સા થશે ખાલી 

તહેવારની સીઝનમાં મોંઘવારીનો માર સામાન્ય જનતાએ વેઠવાનો વારો આવ્યો છે. પેટ્રોલ અને ડીઝલ બાદ હવે PNG અને CNGના ભાવ વધવાને લીધે તહેવારોમાં મોંઘવારીનો બમણો માર સહન કરવાનો પડી રહ્યો છે. 

CNG વાહનચાલકો માટે માઠા સમાચાર

પેટ્રોલ ડીઝલના ભાવ વધારાને કારણે સામાન્ય જનતા ત્રાહિમામ પોકારી ઉઠી છે,  ત્યારે અદાણી CNG દ્વારા પણ ગેસના ભાવમાં 2 રુપિયાનો વધારો કરી દેવાતા સામાન્ય માણસની કમર તૂટી ગઈ છે. ગેસના ભાવમાં વધારો થતા હવે અદાણી CNG ગેસના ભાવ પ્રતિ કિલોના 64.99 રૂપિયા થઈ ગયો છે. અદાણી ગેસ દ્વારા ભાવ વધારો કરાતા ગુજરાત ગેસ ના ભાવ પણ વધ્યા છે.  

અદાણી ગેસમાં 2 રૂપિયાનો ભાવ વધારો 

LPG અને CNG ના ભાવમાં સતત બીજા દિવસે વધારો કરવામાં આવ્યો છે આજે CNGના ભાવમાં પ્રતિ કિલો 2.50 રૂપિયાનો વધારો થયો છે. તો સાથે PNGના પણ વધારો કરવામાં આવ્યો છે. જેના કારણે અદાણી CNG ગેસના પ્રતિકિલોના રૂ.64.99 થયા થયા છે. મોંઘવારીમાં પ્રજા ત્રસ્ત છે ત્યારે અદાણી અને ગુજરાત ગેસ વચ્ચેની ભાવ વધારાની સ્પર્ધાના કારણે દિવાળી જેવા તહેવારોની રોનક બગડી ગઈ છે. મહત્વનું છે કે 1લી નવેમ્બરથી ગુજરાત ગેસે અમલમાં આવે તે રીતે CNGમાં પાંચ રુપિયાનો વધારો કર્યો છે. જેના કારણે ગુજરાત ગેસનો નવો ભાવ 65.74 રૂપિયા પ્રતિ કિલો થયો છે. જ્યારે ઘર વપરાશના PNG ગેસમાં 2.50 રુપિયાનો વધારો કરાયો છે. 

CNG વાહનચાલકોના ખિસ્સા થશે ખાલી 

અગાઉ ઓક્ટરબર મહિનામાં ગુજરાત ગેસે CNGમાં 2.68નો અને PNGમાં 1.35 પૈસાનો વધારો કર્યો હતો ત્યારે બાદ આજે ફરી વધારો ઝીંકાયો છે. મહત્વનું છે કે હાલ આંતરાષ્ટ્રીય સ્તરે ગેસની અછત જેવો માહોલ છે. તેના કારણે ભાવ પર કોઈનું નિયંત્રણ નથી, હાલ કંપનીઓને વધુ કિંમત ચુકવીને ગેસ ખરીદવાની ફરજ પડી રહી છે. જેની સીધી અશર ભારતમાં ઈંધણમાં વધતા ભાવમાં જોવા મળી રહી છે.  

ગુજરાત ગેસ અને અદાણી ગેસના ભાવમાં વધારો 

દોઢ માસ અગાઉ સીએનજીનો ભાવ 54.60 રૂપિયા હતો. ત્યારબાદ ચારેક વખત ભાવ વધારો થતાં 16મી ઓકટોબરે 60.80 થયો હતો. હવે સીએનજી વાહનચાલકો પર ભારણ વધ્યું છે. ખાસ કરીને ભાડે વાહન ફેરવતા લોકો મુશ્કેલીમાં મુકાયા છે. સી.એન.જી.ના ભાવ વધતા રીક્ષા ચાલકો માટે પડતા પર પાટુ જેવી સ્થિતિ થઈ છે. કોરોનામા બેકાર બની ગયેલા રીક્ષા ચાલકોની ગાડી માંડ માંડ પાટા પર આવી હતી, કંપનીઓએ  24 ઓગસ્ટ બાદ અત્યાર સુધીમાં CNGમાં સાબરમતી અને ગુજરાત ગેસે ધરખમ ભાવ વધારો કર્યો છે તો અદાણી ગેસે પણ ભાવ વધારો કર્યો છે . ગેસના ભાવ વધતા જનતા પરેશાન થઈ ઉઠી છે તો બીજી તરફ ધંધાદારી રીક્ષા ચાલકોને આ ભાવ વધારાથી મોટો ઝાટકો લાગ્યો છે.

મોંઘવારીથી રાહત આપવા જનતાની માંગ

બે મહિનામાં થયેલા અસહ્ય ભાવ વધારાને પગલે હવે તો ઘર ચલાવવું કે ગાડી તે પ્રશ્ન ઉભો થયો છે. નોકરિયાત વ્યક્તિ નો પગાર એનો એ જ છે, બીજી તરફ સી.એન.જી, પેટ્રોલ, ડીઝલના ભાવ વધી રહ્યા છે. ત્યારે સામાન્ય માણસનું જીવન મુશ્કેલ મય બન્યું છે. દોઢ માસ અગાઉ સીએનજીનો ભાવ 54.60 રૂપિયા હતો. ત્યારબાદ ચારેક વખત ભાવ વધારો થતાં 16મી ઓકટોબરે 60.80 થયો હતો. 15 દિવસ બાદ સરકારે એક જ રાતમાં ગેસના ભાવમાં રૂપિયા પાંચનો વધારો કર્યો છે. જેના કારણે સીએનજી વાહનચાલકો પર ભારણ વધ્યું છે. ખાસ કરીને ભાડે વાહન ફેરવતા લોકો મુશ્કેલીમાં મુકાયા છે.

રિક્ષા ચાલકોની ચીમકી: હડતાળ કરી 20 રૂપિયા જેટલું ભાડું વધારીશું 

CNG ગેસના ભાવ વધારામાં સૌથી વધુ નુકસાન રિક્ષા ચાલકોને પડે તેમ છે. અમદાવાદમાં CNGના ભાવમાં વધારો થતાં રિક્ષાચાલકો મેદાને આવી ગયા છે. રિક્ષા ચાલકોની ચિમકી ઉચ્ચારી છે કે  જો ભાવ નહીં ઘટાડે તો હડતાળ કરી વિરોધ કરવામાં આવશે અને જો માંગ ન સંતોષાય તો રિક્ષા ભાડામાં રૂ.20નો વધારો કરી દેવામાં આવશે. CNGના ભાવ વધતા રીક્ષા ચાલકોમાં રોષ જોવા મળી રહ્યો છે, રિક્ષા યુનિયન ભાવ ઘટાડાવાની માંગ કરી રહ્યું છે. ભૂખ હડતાળ,વિરોધ પ્રદર્શન કરવાની રિક્ષા ચાલકોએ વાત કરી છે.