ગુજરાત વિધાનસભાની ચૂંટણીનું બીજા તબક્કાનું મતદાન આવતીકાલે થવા જઈ રહ્યું છે. આ પહેલા સોશિયલ મીડિયામાં વાયરલ થયેલા વીડિયોના કારણે દાહોદ જિલ્લાના રાજકારણમાં ગરમાવો આવ્યો છે. દાહોદના દેવગઢ બારિયાના ભાજપના ઉમેદવાર બચુ ખાબડનો વીડિયો વાયરલ થયો છે. જેમાં તેઓ કહી રહ્યા છે કે, "કોઈએ ભાડું આપવાનું નથી બધાનું ભાડું હું આપી દઉં છું" જે બાદ બચુ ખાબડનો વીડિયો વાયરલ મામલે ખુલાસો સામે આવ્યો છે.
બચુ ખાબડનો વીડિયો બાબતે ખુલાસો
બચુ ખાબડનો વાયરલ બાબતે ખુલાસો સામે આવ્યો છે. ભાજપના ઉમેદવાર બચુ ખાબડની પ્રતિક્રિયા સામે આવી છે જેમાં તેમણે જણાવ્યું કે, વીડિયોને એડિટિંગ કરી વાયરલ કરાવામાં આવ્યો છે. ભાડું આપવાની વાતને એડિટિંગ કરી વાયરલ કરવામાં આવી છે તેમણે કહ્યું કે, અમારા વિસ્તારના આદિવાસીભાઇઓ દાહોદ આવતા હતા અને ખબર અંતર પૂછી મતદાન માટે અપીલ કરી હતી તેમણે કહ્યું કે, વોટ માટે કોઈ પક્ષની વાત કરી નથી અને વીડિયો બાબતે કાર્યવાહી માટે ચૂંટણી અધિકારીને જાણ કરી છે
કોઈએ ભાડું આપવાનું નથી બધાનું ભાડું હું આપી દઉં છુંઃ બચુ ખાબડ
આવતીકાલે દેવગઢ બારિયા સહિત મધ્ય ગુજરાત અને ઉત્તર ગુજરાતની 93 બેઠક પર ચૂંટણી યોજાવાની છે. મતદાનને ગણતરીની કલાકો જ બાકી છે, એવામાં દાહોદના દેવગઢ બારિયાના ભાજપના ઉમેદવાર બચુ ખાબડનો વીડિયો વાયરલ થયો હતો. વીડિયોમાં તેઓ મતદારોને લાલચ આપતા જોવા મળી રહ્યા હતા. આ વીડિયામાં ભાજપના ઉમેદવાર બચુ ખાબડ બસમાં બેઠેલા મુસાફરોનું ભાડુ આપીને મત માંગતા પણ જોવા મળી રહ્યાં છે.
'ભાડું તમારે કોઈએ આપવાનું નથી
એક મુસાફરોથી ભરેલી બસની અંદર આવીને ભાજપના ઉમેદવાર વીડિયોમાં કહી રહ્યા છે કે 'ભાડું તમારે કોઈએ આપવાનું નથી, બધાયુનું ભાડું આપી દઉં છું અને પરમદિવસે મત આપી આવજો બધાય.' બસમાં બેઠેલા કોઈ મુસાફર દ્વારા આ વીડિયો ઉતારવામાં હોય તેવું લાગી રહ્યું છે.