ફિલ્મ બાહુબલીમાં વિલન ભલ્લાલદેવનો રોલ ભજવનાર એક્ટર રાણા દગ્ગુબાતીને કોઈ કેવી રીતે ભૂલી શકે. તેનું ભારે ભરખમ શરીર અને શાનદાર બોડી, આ પર્સનાલિટી માટે રાણાએ વર્ષો સુધી મહેનત કરી હતી. પરંતુ હવે તે એકદમ અલગ જ અંદાજમાં જોવા મળી રહ્યો છે. એવા સમાચાર મળી રહ્યાં છે કે, રાણા દગ્ગુબાતીએ 30 કિલો વજન ઘટાડી દીધું છે. તેણે આ શોકિંગ ટ્રાંસફોર્મેશન તેની આગામી ફિલ્મ હાથી મેરે સાથી માટે કર્યું છે. ફિલ્મના સેટ પરથી રાણા દગ્ગુબાતીની જે તસવીરો સામે આવી છે તે ચોંકાવનારી છે.
રાણાએ પોતે આ વિશે જણાવ્યું કે, 30 કિલો વજન ઘટાડવામાં તેની હાલત કેવી થઈ ગઈ હતી. 35 વર્ષીય રાણીએ ફિલ્મ હાથી મેરે સાથીમાં એક સામાન્ય જંગલ મેન બનદેવની ભૂમિકા ભજવી છે. જેથી તેને આ પાત્રને ન્યાય આપવા માટે વજન ઓછું કરવું પડ્યું. જેથી તેણે આ ફિલ્મ માટે 30 કિલો વજન ઘટાડી દીધું. તેના માટે તેણે સ્ટ્રિક્ટ ડાયટ પ્લાન ફોલો કર્યો અને અલગથી ટફ ટ્રેનિંગ પણ લીધી. રાણાએ જણાવ્યું કે, તેને ડાયટમાં પ્રોટીન અને મીઠું પણ ઓછું કરવું પડ્યું હતું. ફિલ્મમાં તેની વધેલી દાઢીનો લૂક જોવા મળી રહ્યો છે.
પોતાના વેટ લોસ પર વાત કરતા રાણાએ કહ્યું કે ડિરેક્ટર પ્રભુ સોલોમોન સર ઇચ્છતા હતા કે આ ફિલ્મમાં મારું પાત્ર રિયલ લાગે અને તેના માટે મારે વજન ઓછું કરવું પડ્યું. જે ઘણું જ મુશ્કેલ હતું કારણ કે મારું ફિઝિક હંમેશાથી ઘણું જ હેવી રહ્યું છે. રાણાએ વધુમાં જણાવ્યું કે ,પતળા દેખાવા માટે મેં બે વર્ષ સુધી ફિઝિકલ ટ્રેનિંગ લીધી. સાથે જ પોતાની ડાયટમાં પણ ઘણાં બદલાવ કર્યા. મેં ખાવાનું સાવ ઓછું કરી દીધું હતું.
તમને જણાવી દઇએ કે આ ફિલ્મ 2 એપ્રિલના રીલિઝ થવાની છે. આ ફિલ્મમાં રાણાનો લુક પહેલાં જ રિવીલ કરી દેવાયો છે. જંગલ-પ્રાણીઓ અને એક જંગલમેન પર આધારિત આ ફિલ્મ ઘણી ભાષાઓમાં રિલીઝ થશે. જેમાં હિંદી, કન્નડ, તમિલ અને તેલુગુ ભાષા સામેલ છે. આ ફિલ્મમાં બોલિવૂડ એક્ટર પુલકિત સમ્રાટ પણ છે. આ સિવાય ઝોયા હુસેન અને શ્રેયા પિલગાંવકર પણ આ ફિલ્મમાં જોવા મળશે.