ગજબ બાકી / કપડાં સૂકવવા ગયેલ બા 19માં માળેથી લપસ્યા, કપડાંથી જ થયો એવો 'ચમત્કાર' કે બચી ગયો જીવ

• 19 માળેથી વૃદ્ધા લપસી તો પણ બચી ગઈ 
• ચમત્કાર સાથે બચી ગયો વૃદ્ધાનો જીવ 
• 82 વર્ષના વૃદ્ધા કપડ સુકવતા લપસ્યા હતા 

ચીનમાં એક વૃદ્ધ મહિલા 19માં માળેથી લપસી ગયા, તેઓ પોતાના ઘરની બાલ્કની કપડાં સૂકવવા ગયા હતા અને તે બાદ પગ લપસી જતાં 19માં માળેથી નીચે પડ્યા, જોકે ત્યારે જ જાણે મોતને થપ્પો દઈને પાછા આવે એમ વૃદ્ધા સાથે ચમત્કાર થયો અને તેમનો જીવ બચી ગયો હતો. 

19માં માળેથી વૃદ્ધા લપસી હતી 

થયું એવું કે 82 વર્ષના બા પોતાના ફ્લેટમાં 19 માં માળે કપડાં સૂકવવા માટે બાલ્કનીમાં આવ્યા હતા અને ત્યારે જ તેમનો પગ લપસી જતાં નીચે પડવા લાગ્યા, પણ તેમનો પગ નીચેના માળમાં સૂકાઈ રહેલા કપડામાં જ ફસાઈ ગયો. મહિલા હવામાં ઝૂલતા રહ્યા હતા. 

આખી સોસાયટીમાં મચી ઉઠી અફરા તફરી 

જેવી લોકોની નજર હવામાં લટકતી મહિલા પર પડી તેવી આખી સોસાયટીમાં અફરાતફરી મચી ગઈ હતી અને તે બાદ તાત્કાલિક પોલીસ અને રેસ્ક્યૂ ટીમને બોલાવવામાં આવી હતી. રેસ્ક્યૂ ટીમે મહિલાને દોરડાથી બાંધીને ધીમે ધીમે ઉપર ખેંચી લીધી અને આમ મહિલાનો જીવ બચી ગયો. 

મહિલાને જરા પણ ઈજા નથી પહોચી 

આશ્ચર્યની વાત છે કે સમગ્ર ઘટનામાં મહિલાને એક ઈજા પણ પહોંચી હતી નહીં, જોકે હવામાં લટક્યા હોવાના કારણે મહિલાને પ્રાથમિક સારવાર આપવામાં આવી. આ ઘટના જોનારા તમામ લોકોએ એમ જ કહ્યું કે વૃદ્ધાનું બચવું એ માત્રને માત્ર ચમત્કાર જ છે.