આપણે બધા જાણીએ છીએ કે ભારતમાં ક્રિકેટને ધર્મની જેમ અને ક્રિકેટર્સને સુપર હીરો કે ભગવાનની જેમ પૂજવામાં આવે છે. આથી આજે અહીં વર્તમાન IPLમાં રમી રહેલા કેટલાક એવા ખેલાડીઓ પર નજર કરીએ, જેમનામાં ક્રિકેટ ચાહકોને સુપર હીરોની ઝલક દેખાઈ રહી છે.
ભારતમાં હાલ IPLની ધૂમ મચેલી છે. જેમ જેમ લીગ પ્લે ઓફ તરફ નજીક પહોંચી રહી છે તેમ તેમ ચાહકોમાં IPLનો રોમાંચ વધી રહ્યો છે. આ બધા વચ્ચે હોલિવૂડની સુપરહિટ ફિલ્મ 'એવેન્જર્સઃ એન્ડગેમ' ગત શુક્રવારે ભારતભરમાં રિલીઝ થઈ. માર્વલ કોમિક્સ પર આધારિત ફિલ્મ 'એવેન્જર્સઃ એન્ડગેમ' ફિલ્મ રિલીઝ થતાં બોક્સ ઓફિસ પર અનેક રેકોર્ડ ધ્વસ્ત કરી નાખ્યા. આપણે બધા જાણીએ છીએ કે ભારતમાં ક્રિકેટને ધર્મની જેમ અને ક્રિકેટર્સને સુપર હીરો કે ભગવાનની જેમ પૂજવામાં આવે છે. આથી આજે અહીં વર્તમાન IPLમાં રમી રહેલા કેટલાક એવા ખેલાડીઓ પર નજર કરીએ, જેમનામાં ક્રિકેટ ચાહકોને સુપર હીરોની ઝલક દેખાઈ રહી છે.
એમ. એસ. ધોની: કેપ્ટન અમેરિકા
મહેન્દ્રસિંહ ધોનીનું નામ સાંભળતાં જ મનમાં સૌથી પહેલા કેપ્ન કૂલની છબી નજરે પડે છે, જે એવેન્જર્સના કેપ્ટન અમેરિકાથી ઘણી મળતી આવે છે. ધોનીની કેપ્ટનશિપમાં ચેન્નઈની ટીમ ત્રણ IPL ખિતાબ જીતી ચૂકી છે. ધોની વિકેટકીપર અને બેટ્સમેન તરીકેની પોતાની ભૂમિકા તો શાનદાર રીતે નિભાવે જ છે, એ ઉપરાંત કેપ્ટન અમેરિકાની જેમ આખી ટીમને લીડ પણ કરે છે. મેચ દરમિયાન પરિસ્થિતિ ગમે તેટલી વિપરીત હોય, ધોની શાંત જ નજરે પડે છે. એ જ કારણ છે કે કેપ્ટન મહેન્દ્રસિંહ ધોની IPLનો કેપ્ટન અમેરિકા છે.
વિરાટ કોહલી: આયર્ન મેન
વિરાટ કોહલી વર્તમાન સમયનો સૌથી મોટો ક્રિકેટર છે, જેનું સૌથી મોટું કારણ છે કે ક્રિકેટ પ્રત્યેનું તેનું ઝનૂન. ક્રિકેટમાં ટોચ સુધી પહોંચવા માટે કોહલીએ ઘણો ત્યાગ કર્યો છે અને સખત મહેનત પણ કરી છે, જે તેને IPLનો આયર્ન મેન બનાવે છે. વિરાટ સ્વભાવથી ઘણો અક્કડ અને આક્રમક હોવા છતાં કરોડો ક્રિકેટ ચાહકો તેને પ્રેમ કરે છે. સુપરહીરો આયર્ન મેનનું પણ કંઈક આવું જ છે.
રોહિત શર્મા: થોર
વન ડે ઇન્ટરનેશનલમાં ત્રણ બેવડી સદી ફટકારી ચૂકેલા રોહિત શર્માની જો એવેન્જર્સના કોઈ સુપર હીરો સાથે સરખામણી કરવામાં આવે તો તે ફક્ત થોર જ હોઈ શકે. જે રીતે એવેન્જર્સમાં થોર પોતાના હથોડાથી દુશ્મનોની પિટાઈ કરે છે, કંઈક એવી જ રીતે રોહિત શર્મા હરીફ બોલર્સની ધુલાઈ કરે છે. થોરની જેમ રોહિતને રોકવો પણ ઘણો મુશ્કેલ હોય છે. આથી જ રોહિતને ચાહકોએ 'હિટમેન' નામ આપ્યું છે.
આન્દ્રે રસેલ: હલ્ક
કોલકાતા નાઇટ રાઇડર્સ તરફથી IPLમાં રમતાે વિન્ડીઝનો આન્દ્રે રસેલ એમ તો સ્વભાવે ઘણો શાંત જોવા મળે છે, પરંતુ જ્યારે તેને ગુસ્સો આવે છે ત્યારે તે એવેન્જર્સના હલ્ક જેવો બની જાય છે. ગુસ્સે થયેલા હલ્કથી બચવું બહુ મુશ્કેલ હોય છે. IPLની વર્તમાન સિઝનમાં રસેલના આ આંકડા કંઈક આવું જ દર્શાવે છે. આ સિઝનમાં રસેલ ૨૦૦ કરતા વધુ સ્ટ્રાઇક રેટથી ૪૦૦ ઉપરાંત બનાવી ચૂક્યો છે, જેમાં ૪૨ ગગનચૂંબી છગ્ગા સામેલ છે. કદ-કાઠી અને વિશાળકાય શરીરના હિસાબે પણ રસેલ અને હલ્કમાં ઘણી સમાનતા જોવા મળે છે.
એ. બી. ડિવિલિયર્સ: સ્પાઇડરમેન
ક્રિકેટરમાં 'મિસ્ટર ૩૬૦'ના નામથી મશહૂર એ. બી. ડિવિલિયર્સની જો એવેન્જર્સના કોઈ સુપર હીરો સાથે સરખામણી કરવામાં આવે તો તે ફક્ત સ્પાઇડરમેન જ હોઈ શકે. જે રીતે લાલ રંગના પોશાકમાં સ્પાઇડરમેન દુશ્મનોને ધૂળ ચટાડે છે, કંઈક એવી જ રીતે આરસીબીની લાલ જર્સીમાં બોલર્સ સામે મેદાનમાં ડિવિલિયર્સ ચારે તરફ શોટ ફટકારે છે. સ્પાઇડરમેનની જેમ જ ડિવિલિયર્સ પોતાની ટીમમાં મહત્ત્વપૂર્ણ ભૂમિકા હંમેશાં નિભાવતો રહે છે.